World Athletic Championship 2022 : भारताने जागतिक अॅथलेटिक्स चॅम्पियनशिपमध्ये आज दमदार कामगिरी करत भालाफेक (Javelin) आणि ट्रिपल जंपमध्ये (Triple Jump) अंतिम फेरी गाठली. भालाफेकीत ऑलिम्पिक सुवर्णपदक विजेत्या नीजर चोप्रा (Neeraj Chopra), रोहित यादव (Rohit Yadav) यांनी अंतिम फेरी गाठली. तर ट्रिपल जंपमध्ये एल्डहोस पॉलने (Eldhose Paul) अंतिम फेरी गाठली. वर्ल्ड अॅथलेटिक्स चॅम्पियनशिपमध्ये ट्रिपल जंप प्रकारात अंतिम फेरी गाठणारा पॉल हा पहिला भारतीय खेळाडू ठरला.

नीरज चोप्रा 88.39 मीटर भाला फेकून पहिल्या प्रयत्नातच फायनलसाठी पात्र झाला. याचबरोबर चोप्रा फायनलच्या लिस्टमध्ये अव्वल आहे. त्यामुळे तो सुवर्ण पदकाचा प्रबळ दावेदार आहे. पुरूष भालाफेकीत अजून एका भारतीय खेळाडूने चमकदार कामगिरी केली आहे. नीरज चोप्रा पाठोपाठ रोहित यादवने देखील भालाफेकीची अंतिम फेरी गाठली आहे. रोहित 80.42 मीटर भाला फेक करत अंतिम फेरीसाठी पात्र होणाऱ्यांच्या 12 जणांच्या यादीत 11 व्या स्थानावर राहिला.

ट्रिपल जंपमध्ये एल्डहोस पॉल वर्ल्ड अॅथलेटिक्स चॅम्पियनशिपमध्ये अंतिम फेरी गाठणारा पहिला भारतीय खेळाडू ठरला. त्याने पात्रता फेरीत ग्रुप अ मध्ये 16.68 मीटर जंप करत सहावे स्थान पटकावले. तर तो अतिंम फेरी गाठणाऱ्या 12 जणांच्या यादीत 12 व्या स्थानावर राहिला. आता ट्रिपल जंपची फायनल रविवारी (24 जुलै) सकाळी 6.50 मिनिटांनी होणार आहे.

भारताने यंदाच्या वर्ल्ड अॅथलेटिक्स स्पर्धेत पहिल्यांदाच दमदार कामगिरी केली आहे. भारताचे सहा अॅथलिट वेगवेगळ्या क्रीडा प्रकारात अंतिम फेरीत पोहचले आहेत. लांब उडीत श्रीशंकर, भालाफेकीत नीरज चोप्रा, रोहित यादव, महिला भालाफेकीमध्ये अन्नू राणी, ट्रिपल जंपमध्ये एल्डहोस पॉल तर स्टीपलचेसमध्ये अविनाश साबळे यांनी अंति फेरी गाठली आहे.