नवी दिल्ली : भारताच्या नीतू वघास व स्विटी बुरा या महिला खेळाडूंनी शनिवारचा दिवस गाजवला. नीतू व स्विटी या दोघींनी पहिल्यांदाच जगज्जेतेपदावर नाव कोरले. मायदेशात सुरू असलेल्या जागतिक महिला बॉक्सिंग स्पर्धेत दोघींनी आपापल्या गटात विजेता होण्याचा मान संपादन केला.

नीतू हिने ४८ किलो वजनी गटात कझाकस्तानच्या लुतसाईखान अल्तांतसेतसेग हिच्यावर ५-० असा विजय साकारला. कझाकस्तानची लुतसाईखान ही दोन वेळा आशियाई स्पर्धेची ब्राँझपदक विजेती होती; मात्र नीतूच्या आक्रमक खेळासमोर तिचा निभाव लागला नाही. नीतूच्या दमदार ठोशांसमोर लुतसाईखान निष्प्रभ ठरली. पहिल्या दोन फेल्यांमध्ये नीतू हिच्याकडे ५० आणि ३-२ अशी आघाडी होती. यावरूनच ही लढत एकतर्फी झाल्याचे प्रकर्षाने दिसून येते.

स्विटी आणि चीनच्या बॅग लिना यांच्यामध्ये कडवा संघर्ष पाहायला मिळाला. पहिल्या दोन फेऱ्यांमध्ये स्विटीकडे ३-२ अशी आघाडी होती. तिसऱ्या फेरीमध्ये स्विटीने आणखी चांगली कामगिरी केली. यामध्ये ती ४-१ अशी पुढे गेली. या लढतीचा निकाल रिव्यूनंतर लावण्यात आला. स्विटी हिने ८१ किलो वजनी गटात ४-३ अशा फरकाने ही लढत आपल्या नावावर केली.

दरम्यान, टोकियो ऑलिंपिकमध्ये ब्राँझपदक जिंकणाऱ्या इटलीच्या आयम टेस्टा हिने ५७ किलो वजनी गटात पहिल्यांदाच विश्वविजेती होण्याचा मान संपादन केला. तिने कझाकस्तानच्या कॅरिना इब्राहिमोवा हिला ५-० असे पराभूत करून सुवर्णपदकाला गवसणी घातली. मागच्या स्पर्धेत तिला रौप्यपदकावर समाधान मानावे लागले होते.

भारताच्या जगज्जेतेपदात वाढ

याआधीपर्यंत भारताच्या पाच महिला बॉक्सर्सनी जगज्जेतेपद पटकावले होते. यामध्ये मेरी कोम, सरिता देवी, जेनी आरएल, लेखा केसी व निखत झरीन यांचा समावेश होता. आता या यादीत आणखी दोन नावांचा समावेश झाला आहे. नीतू धंघास व स्विटी बुरा यांनी संपूर्ण स्पर्धेमध्ये नेत्रदीपक कामगिरी करीत भारतासाठी मोलाची कामगिरी केली.

जगज्जेतेपद पटकावल्यानंतर माझा आनंद गगनात मावेनासा झाला आहे. अंतिम लढतीआधी आक्रमक खेळ करण्याचा विचार केला होता. अन् त्याचप्रमाणे रिंगणात खेळ केला. याप्रसंगी माझ्या कुटुंबासह सर्व प्रशिक्षकांचेही आभार मानते. प्रशिक्षक भास्कर सरांच्या मार्गदर्शनामुळे हे शक्य झाले आहे, त्यांचेही योगदान मोलाचे आहे. • नीतू धंघास, जगज्जेती, भारत