Wrestlers Protest Rakesh Tikait : भारतीय महिला कुस्तीपटूंच्या समर्थनार्थ भारतीय किसान युनियन आणि खाप पंचायत येत्या 9 जूनला जंतर - मंतरवर आंदोलन करणार होते. मात्र शेतकरी नेते राकेश टिकैत यांनी आज हे आंदोलन मागे घेतले असल्याचे सांगितले. राकेश टिकैत यांनी जर 9 जूनपर्यंत बृजभूषण यांना अटक झाली नाही तर खाप पंचायत आंदोलन करणार असा इशारा दिला होता. मात्र आता हे आंदोलन होणार नाहीये. हा कार्यक्रम रद्द करण्यात आला आहे. बजरंग पुनियाने देखील रविवारी महापंचायतीमध्ये शेतकरी आणि खाप पंचायतींना याबाबत निर्णय न घेण्याची विनंती केली होती.

एबीपीने दिलेल्या बातमीनुसार राकेश टिकैत यांनी सांगितले की, 'आता कुस्तीपटूंची सरकार आणि गृहमंत्री यांच्यासोबत चर्चा सुरू आहे. यांच्या सांगण्यावरून 9 जून रोजी जंतर मंतरवर होणारे आंदोलन स्थगित करण्यात आले आहे. कुस्तीपटू येणाऱ्या काही दिवसात जी पुढची तारीख देतील त्यावेळी नक्कीच त्यांच्या समर्थनात उतरू.' बजरंग पुनिया, विनेश फोगाट आणि साक्षी मलिक हे शनिवारी गृहमंत्री अमित शहा यांना भेटले होते. ही बैठक दोन तास चालली होती.

खेळाडू करणार महापंचायत

ऑलिम्पिक पदक विजेता बजरंग पुनिया अमित शहांशी भेट घेतल्यानंतर पुढच्या दिवशी सोनीपथ येथील मुंडलाना पंचायतीमध्ये पोहचला होता. त्यावेळी त्याने शेतकरी आणि खाप पंचायतींना संबोधित करताना सांगितले की, 'मी तुम्हाला विनंती करतो की आता कोणताही निर्णय घेऊ नका. लवकरच आम्ही सर्व क्रीडा संघटनांना एका मंचावर बोलवून एक मोठी पंचायत आयोजित करणार आहोत. महापंचायतीबाबत तीन ते चार दिवसात निर्णय घेतला जाईल. याबरोबरच सर्व पंचायतींना स्थान आणि वेळेबाबत देखील माहिती दिली जाईल.'

(Sports Latest News)