कोलकाता : भारताचा विकेटकिपर बॅट्समन वृद्धीमान साहाने (Wriddhiman Saha) नुकतेच बंगाल क्रिकेट असोसिएशनकडे (CAB) दुसऱ्या संघाकडून खेळण्यासाठी लागणारे ना हरकत प्रमाणपत्र (NOC) मिळावे यासाठी अर्ज केला आहे. जवळपास 15 वर्षे पश्चिम बंगालच्या रणजी संघाकडून खेळणारा वृद्धीमान साहा आता बंगालचा संघ सोडणार आहे. बंगाल यंदाच्या रणजी ट्रॉफीच्या बाद फेरीत पोहचला आहे. साहाच्या संघातील समावेशाबाबत बंगाल क्रिकेट असोसिएशनचे पदाधिकारी वेळोवेळी बोलत आले आहेत. मात्र साहाने आतापर्यंत कोणतेही भाष्य केले नव्हते. अखेर वृद्धीमान साहाने या संपूर्ण प्रकणावर पहिल्यांदाच भाष्य केले.

वृद्धीमान साहाने बंगाल क्रिकेट असोसिएशनचे सह सचिव देबब्रत दास (Debabrata Das) यांनी केलेल्या वक्तव्याने आपल्याला दुःख झाल्याचे सांगितले. दास यांनी वृद्धीमान साहाच्या वचनबद्धतेवर प्रश्नचिन्ह उपस्थित केले होते. याबाबत साहा म्हणाला 'बंगालकडून इतकी वर्षे खेळल्यानंतरही मला यातून जावे लागत असल्याने माझ्या मनात देखील दुःखी भावना निर्माण झाली होती.' वृद्धीमान साहाने हे वक्तव्य स्पोर्ट्सस्टारशी बोलताना केले.

साहा पुढे म्हणाला की, 'लोक तुमच्या प्रामाणिकपणावर प्रश्न उपस्थित करतात त्यावेळी ते निराशाजनक असते. एक खेळाडू म्हणून मी यापूर्वी अशा गोष्टींचा सामना केला नव्हता. पण, आता हे होत आहे. मला आता पुढं गेलं पाहिजे.' दरम्यान, साहाला पुढच्या हंगामात काय करणार असे विचारले असता त्याने मोघम उत्तर दिले.

तो म्हणाला, 'मी खूप लोकांशी बोललो आहे. मात्र अजून मी कोणताही निर्णय घेतलेला नाही. पुढचा हंगाम सुरू होण्यासाठी अजून खूप कालावधी आहे.' वृद्धीमान साहा यंदाच्या आयपीएल हंगामात गुजरात टायटन्सकडून खेळला होता. त्याने देखील संघाच्या विजयात आपले योगदान दिले. त्याने 11 सामन्यात 317 धावा केल्या. यात तीन अर्धशतकांचा देखील समावेश आहे.