ICC World Test Championship Final 2021 : भारत आणि न्यूझीलंड यांच्यातील वर्ल्ड टेस्ट चॅम्पियनशिपच्या फायनलसाठी मैदानात उतरण्यापूर्वी युवा सलामीवीर शुभमन गिलने आपले इरादे स्पष्ट केले. इंग्लंडच्या मैदानात न्यूझीलंडविरुद्धचा फायनल सामना माझ्या करियरमधील सर्वात मोठा क्षण आहे. दबावात न खेळता धावा करण्यावर भर देईन, असे त्याने म्हटले आहे. (WTC Final Will Be The Biggest Match Of My Life Says Shubman Gill)

जेव्हा तुम्ही धावा करता त्यावेळी गोलंदाज बॅकफूटवर जातो. गोलंदाजांना दबावात टाकण्यासाठी धावा करणे हाच मंत्र उपयुक्त ठरतो, असे सांगत त्याने फायनलमध्ये उपयुक्त खेळी करण्यासाठी उत्सुक असल्याचे सांगितेल. कोलकाता नाईट रायडर्सच्या अधिकृत वेबसाईटला दिलेल्या मुलाखतीमध्ये शुभमन गिलने मजबूत इराद्याने मैदानात उतरण्यास सज्ज असल्याचे सांगितले.

सराव सामन्यात 85 धावांची दमदार खेळी करुन 15 सदस्यीय टीम इंडियात स्थान मिळवलेल्या शुभमन गिलली प्लेइंग इलेव्हनमध्येही स्थान पक्के केले आहे. रोहित शर्माच्या साथीने तो संघाच्या डावाची सुरुवात करेल. इंग्लंड दौऱ्यावर तो अडखळत खेळताना दिसला होता. पण ऑस्ट्रेलिया दौऱ्यावरील दमदार कामगिरीच्या जोरावर टीम व्यवस्थापनाने त्याच्यावर भरवसा दाखवला आहे. संघाला चांगली सुरुवात करुन देण्याची जबाबदारी त्याच्यावर असेल. शुभमन गिलने टीम इंडियाकडून 7 कसोटी सामन्यात 34.4 च्या सरासरीने 378 धावा केल्या आहेत. याशिवाय अंडर 19 आणि इंडिया ए कडून इंग्लंडच्या मैदानात खेळण्याचा अनुभव त्याच्या पाठिशी आहे. त्याचा त्याला या दौऱ्यावर निश्चितच फायदा होईल.

ऑस्ट्रेलिया दौऱ्यात शुभमन गिलने 91 धावांची खेळी केली होती. ही त्याच्या कसोटी कारकिर्दीतील आतापर्यंतची सर्वोच्च कामगिरी आहे. 7 सामन्यातील 13 डावात त्याने 644 चेंडूचा सामना करताना 378 धावा केल्या आहेत. पहिल्या शतकाच्या प्रतिक्षेत असलेल्या शुभमन गिलने 3 अर्धशतके झळकावली आहेत.