ऑस्ट्रेलियाचा दिग्गज फिरकीपटू शेन वॉर्न याचे ह्दयविकाराच्या झटक्यानं निधन झाले. त्याच्या जाण्याचे वृत्त क्रिकेट जगताला मोठा धक्काच होता. या वृत्तानंतर अनेक क्रिकेट चाहत्यांना वॉर्नचा क्रिकेट प्रवास डोळ्यासमोर उभा राहिला. कसोटी क्रिकेटमध्ये सर्वात पहिल्यांदा सातशे विकेट्सचा टप्पा गाठणाऱ्या शेन वॉर्नने भारतीय संघा विरुद्धच्या सामन्यातूनच कसोटी कारकिर्दीला सुरुवात केली होती. 1992 मध्ये सिडनीच्या मैदानातील पदार्पणाच्या सामन्यात युवा शेन वॉर्नची रवि शास्त्रींनी चांगलीच धुलाई केली होती. पण शेवटी द्विशतकवीर शास्त्रीला बाद करण्यात वॉर्न यशस्वी ठरला होता. शास्त्रींनी या सामन्यात 206 धावा केल्या होत्या. दुसऱ्या बाजूला मास्टर ब्लास्टर सचिन तेंडुलकरने या सामन्यात नाबाद 148 धावांची खेळी केली होती.

ऑस्ट्रेलियाकडून पहिल्या कसोटी सामन्यात शेन वॉर्नने 45 षटके गोलंदाजी केली होती. यात 7 निर्धाव षटकासह त्याने रवि शास्त्रीच्या रुपात एकमेव विकेट घेतली. ज्या सिडनीच्या ग्राउंडवर वॉर्नने पहिला कसोटी सामना खेळला त्याच मैदानात त्याने इंग्लंडविरुद्ध शेवटचा कसोटी सामना खेळला. या सामन्यातील पहिल्या डावात त्याने मॉन्टी पानेसरला शून्यावर बाद करत आंतरराष्ट्रीय क्रिकेटमध्ये हजारी पूर्ण केली होती. दुसऱ्या डावात अँड्रू फ्लिंटॉफची विकेट घेतली एडम गिलख्रिस्ट वॉर्नच्या गोलंदाजीवर सुरेख स्टम्पिंग केले होते. ही त्याच्या कसोटी कारकिर्रदीतील कसोटीतील शेवटची विकेटच ठरली.

1992 मध्ये आंतरराष्ट्रीय क्रिकेटमध्ये पदार्पण करणाऱ्या शेन वॉर्नने 15 वर्षांच्या कारकिर्दीत ऑस्ट्रेलियासाठी (Australia) 145 कसोटी सामने खेळले. यात त्याने 708 विकेट घेतल्या. 194 वनडे सामन्यात त्याच्या खात्यात 293 विकेट्सची नोंद आहे.