Yuvraj Singh Goa Holiday Home : भारताचा माजी स्टार क्रिकेटपटू युवराज सिंग आपले गोव्यातील हॉलिडे होम दोन दिवसांसाठी सहा जणांच्या ग्रुपला देणार आहे. यासाठी तो आंतरराष्ट्रीय दर्जाच्या एअरबीएनबी (Airbnb) संस्थेचा होस्ट झाला आहे. गोव्याच्या नयनरम्य टेकडीवर युवराज सिंगचे 'कासा सिंग' हे हॉलिडे होम आहे. युवराज सिंगच्या घरातून गोव्याचा समुद्रकिनारा, सनसेटचा नजारा पाहता येतो तसेच घरातील स्विमिंग पूल आणि स्वादिष्ट जेवणाचाही आस्वाद घेता येईल. युवराज सिंग हा Airbnb वर होस्ट करणारा पहिला भारतीय आंतरराष्ट्रीय क्रिकेटपटू आहे.

युवराज सिंगने देखील आपल्या सोशल मीडिया अकाऊंटवर याबाबत माहिती दिली. तो आपल्या पोस्टमध्ये लिहितो की, 'माझ्या कामामुळे मी जगभर फिरत असतो. गोव्यातील माझे घर माझ्यासाठी आणि माझ्या कुटुंबासाठी एक शांत ठिकाण आहे. मला सांगायला आनंद होत आहे की सहा जणांच्या समुहासाठी माझे हॉलिडे होम मी देऊ इच्छितो. याचे बुकिंग फक्त airbnb.com/yuvrajsingh याच्यावर करता येईल. 'कासा सिंग'साठी बुकिंग 28 सप्टेंबर दुपारी 1 वाजल्यापासून सुरू होणार आहे.'

'कासा सिंग' मध्ये राहणाऱ्या अतिथींसाठी खालील विशेष सुविधा असणार आहेत.

• आगमनानंतर युवराज सिंग यांच्याकडून व्हर्च्युअल पद्धतीने अभिवादन

• सिंग यांच्या गोव्यातील आवडत्या हँगआउट स्पॉट्स शेअर करणारी स्वागत टिप

• नयनरम्य दिवार बेटावर ई-बाईकवर सहल, खारफुटीचे शेत, चर्च, मंदिरे आणि सुंदर घरे यातून फिरण्याचा अनुभव

• युवराज यांच्या आयकॉनिक इनिंगचे स्क्रीनिंग - क्रिकेटरच्या घरी त्या क्षणांचे पुनरुज्जीवन

• मुक्कामाला असेपर्यंत युवराज यांचे आवडते स्थानिक पदार्थ चाखण्याची संधी

• युवराज यांच्याकडून वैयक्तिकृत स्मरणिका