Yuvraj Singh Stuart Broad : इंग्लंडचा वेगवान गोलंदाज स्टुअर्ट ब्रॉडने नुकतेच क्रिकेटमधून निवृत्ती होत असल्याची घोषणा केली. स्टुअर्ट ब्रॉडने 344 सामन्यात 845 विके्स घेणारा ब्रॉड हा ऑस्ट्रेलियाविरूद्धच्या पाचव्या अॅशेस कसोटीनंतर निवृत्त होणार आहे.

ब्रॉडने निवृत्तीची घोषणा करताच सोशल मीडियावर त्याच्यासोबत खेळलेल्या खेळाडूंच्या प्रतिक्रियांचा पाऊस पडत होता. मात्र या सर्वांमध्ये सर्वात लक्षवेधी प्रतिक्रिया ही युवराज सिंगची ठरली. युवराज सिंगने 2007 च्या टी 20 वर्ल्डकपमध्ये स्टुअर्ट ब्रॉडला एका षटकात सहा षटकार ठोकण्याचा पराक्रम केला होता. (Stuart Broad Retirement News)

युवराज सिंग (Yuvraj Singh) आपल्या ट्विटमध्ये म्हणतो, 'स्टुअर्ट ब्रॉडच्या कामगिरीला सलाम! तुझ्या जबरदस्त कसोटी कारकिर्दीसाठी तुझं अभिनंदन, लाल चेंडूवरचा एक अत्यंत उत्तम आणि दरारा निर्माण करणारा गोलंदाज अन् खरा दिग्गज! तुझा प्रवास आणि दृढनिश्चय या नक्कीच प्रेरणा देणार आहे. भविष्यासाठी शुभेच्छा ब्रॉडी!'

युवराजने 2007 च्या टी 20 वर्ल्डकपमध्ये ब्रॉडला सहा चेंडूत सहा षटकार मारत अस्मान दाखवलं होत. मात्र त्यानंतर ब्रॉड खचून गेला नाही तर त्याने आंतरराष्ट्रीय स्तरावर आपल्या कामगिरीचं नाणं खणखणीत वाजवून दाखवलं. त्याने आंतरराष्ट्रीय क्रिकेटमध्ये जवळपास 850 विकेट्स घेतल्या आहेत.

ब्रॉडने आपल्या निवृत्तीची घोषणा अॅशेस 2023 मधील ऑस्ट्रेलियाविरूद्धच्या पाचव्या कसोटीच्या तिसऱ्या दिवशी केली. ओव्हलवर सुरू असलेल्या सामन्याचा तिसरा दिवस संपला त्यावेळी ब्रॉड म्हणाला,

'उद्या किंवा सोमवारी मी माझ्या क्रिकेट कारकिर्दीतला शेवटचा सामना खेळत असेन. हा खूप सुंदर प्रवास होता. नॉटिंगहमशायर आणि इंग्लंडची कॅप घालणे ही खूप मोठी गौरवाची बाब होती. सर्वोच्च शिखरावर असताना निवृत्ती घेण्याची माझी मनिषा होती. या मालिकेत मी खेळाचा सर्वात जास्त आनंद घेतला.'

स्टुअर्ट ब्रॉचने 167 कसोटीत 602 विकेट्स घेतल्या आहेत. त्याने कसोटीत फलंदाजीत देखील मोठे योगदान दिले आहे. त्याने 1 शतक आणि 13 अर्धशतकांच्या सहाय्याने तब्बल 3656 धावा केल्या आङेत. तो कसोटीत सर्वाधिक विकेट्स घेणाऱ्यांच्या यादीत पाचव्या स्थानावर आहे.

(Sports Latest News)