दिवाळी म्हणजे दिव्यांचा उत्सव. दिवाळीच्या चार दिवसांत आपण आपल्या घरात, अंगणात, रांगोळीमध्ये असे ज्याठिकाणी दिवे लावतो आणि दिपोत्सव साजरा करतो. पुराणातील कथांनुसार दिवाळीच्या दिवशी प्रभू श्रीराम अयोध्येत परतले होते. रावणाचा वध करून ते अयोध्यानगरीत आल्यानंतर अयोध्या नगरी दिव्यांनी उजळवण्यात आली होती.

सुख-समृदी वाईट किंवा अंधार दूर करून दिव्याच्या ज्योतीप्रमाणे सकारात्मकता आणणारा सण म्हणजे दिवाळी. 

आनंद आणि समृद्धीची इच्छा बाळगण्यासाठी दिवाळीपेक्षा आणखी कोणता सण नाही, या निमित्ताने लक्ष्मीचीही पूजा केली जाते. दिवाळीबरोबरच धनत्रयोदशी, वसूबारस, पाडवा आणि भाऊबीज असे सणही साजरे केले जातात.धनत्रयोदशीपासून या दीपावलीची सुरुवात होते. दिव्यांची आरास, दारासमोर रांगोळी नवीन कपडे आणि फराळ करण्याची पद्धत आहे.

सुख-समृद्धीचे प्रतीक असलेला हा सण साजरा करत असताना घरात व अंगणात दिवे लावताना, विद्युत रोषणाई करताना वास्तुशास्त्रानुसार थोडी काळजी घेण्याची गरज आहे. 

उत्साहाच्या भरात हा दिपोत्सव आपल्याच अंगलट येतो आणि त्यातूनच चटका बसण्याच्या, कपडे जळण्याच्या घटना घडतात. असा प्रकार आपल्या घरी होऊ नये, यासाठी दिपोत्सव  साजरा करताना या काही गोष्टींची  काळजी नक्की घ्या.

● तुमच्या घरात लहान मुले असतील तर शक्यतो पायऱ्यांवर, अंगणामध्ये दिवे लावू नका. कारण कारण कपड्याला आग लागण्याची शक्यता असते.

● बॅटरीवर चालणाऱ्या कृत्रिम दिव्यांचा वापर करा.अनेक जण गॅलरीमध्ये किंवा घराच्या कम्पाउंड वॉलवर दिवे लावतात. 

● चुकून धक्का लागून खाली पडण्याची शक्यता असते. अशावेळी खाली कुणी उभं असेल तर अपघात होऊ शकतो.

● रांगोळीमध्ये शक्यतो एकच मोठा दिवा लावा आणि तो ही रांगोळीच्या मधोमध. 

● हँगिंग दिवे शक्यतो लावू नका.

● दिवे लावताना आपण ते सगळे एका ताटात घेतो आणि मग एकेका जागी नेऊन ठेवतो. 

● ते ताट खूप उथळ नाही ना, दिवे व्यवस्थित बसले आहेत ना, याची काळजी घ्या. 

● पुजेच्या चौरंगाच्या अगदी जवळ दिवा ठेवू नका. पूजा करताना चुकून चटका बसू शकतो.