आपल्यापैकी अनेकांना शॉपिंगची भारी हौस असते. मात्र अशक्त झालेला खिसा बघून अनेकजण शॉपिंगचा मोह आवरता घेतात. मात्र फॅशनेबल दिसण्याची हौस आता कमी खर्चातही भागवता येऊ शकते. काही टिप्स जाणून घ्या जेणेकरुन तुम्ही कमी खर्चात फॅशनेबल राहू शकता.

सगळ्यात महत्त्वाचं म्हणजे दागिने. नुसते कपडेच नव्हे, तर दागिन्यांमुळेही तुमच्या लुकमध्ये कमालीचा बदल होऊ शकतो. बाजारात सहज मिळणारे, गोल्ड प्लेटेड किंवा सिल्व्हर प्लेटेड कानातले, लेअर्ड नेकलेसेस असे काही दागिने आपल्या कपड्यांची शोभा वाढवू शकतात. बेल्टऐवजी सिल्व्हर आणि गोल्ड प्लेटेड साखळी वापरल्यानेही एक हटके लूक येऊ शकतो.

दुसरी गोष्ट बॅग. आपल्या कपड्यांना मॅचिंग बॅगमुळे आपल्या आऊटफिटला एक वेगळी शोभा येईल. किमान एक काळी आणि एक पांढरी बॅग आपल्या वॉर्डरोबमध्ये असायलाच हवी. या रंगाच्या बॅग्ज शक्यतो सगळ्या ड्रेसेस सोबत आपण कॅरी करू शकतो.

सध्या नवनव्या पॅटर्नचे कपडे बाजारात येतायत. अशावेळी ड्रेस मटेरियल किंवा नवा संपूर्ण ड्रेस खरेदी करण्यापेक्षा लेगिंग्ज आणि कुर्ती खरेदी करा. म्हणजे गोल्डन रंगाची लेगिंग्ज खरेदी केली, तर त्यावर गोल्डन छटा असलेल्या सगळ्या कुर्ती आपण कॅरी करू शकतो. तर काळ्या लेगिंग्जवर किंवा पलाझो वर आपण कोणत्याही रंगाची कुर्ती वापरू शकतो.