वेड हा मराठी चित्रपट येत्या 30 डिसेंबरला प्रेक्षकांच्या भेटीला येतोय. जिनिलिया देशमुख या निमित्ताने पहिल्यांदाच मराठी चित्रपटसृष्टीत डेब्यू करणार आहे. या चित्रपटात श्रावणी आणि सत्या यांची अनोखी प्रेमकहाणी पाहायला मिळणार आहे. या चित्रपटाच्या निमित्ताने जिनिलिया देशमुखने मधुराज रेसिपी या शोमध्ये हजेरी लावली होती. तिथे तिने रितेश आणि मुलांसाठी डब्यात काय द्यायचे, याच्याही टिप्स दिल्या आहेत.

जेनेलियाने मधुराकडून खास चिकन शिवाय चिकन पुलाव कसा करायचा हे शिकले. त्यासाठी लागणारे सॉसेज चिकनचे प्रोडक्टही जेनेलियानेच लॉन्च केले आहे. जेनेलिया, रितेश आणि त्यांची मुलेही वेगन आहेत. ते मांसाहार करत नाहीत. याबद्दल बोलताना ती म्हणाली की, आधी आम्ही दोघेही मांसाहारावर अक्षरश: तुटून पडायचो. पण नंतर त्याचा त्रास होऊ लागल्याने शाकाहारी व्हायचे ठरवले.

असाच एकदा अमेरिकेत असताना रितेशने खिमा खाल्ला. तोही व्हेज होता. त्याला तो नॉनव्हेज पदार्थच वाटला. त्यावेळी आपण हे भारतात का नाही सुरू करू शकत अस आम्हाला वाटलं. त्यामूळे आम्ही भारतातही हा पदार्थ लॉन्च केला. सॉसेज चिकन हे शाकाहारी असून ते मासांहारा इतकेच प्रोटीन्स आणि फायबर देते. त्याची चवही मांसाहारासारखीच असल्याचे तिने सांगितले. हेच सॉसेज वापरून माझ्या सासूबाईंनी चिकन सुक्क केलं होतं. आणि घरातही ते सर्वांना आवडलं होतं, असेही ती म्हणाली.

तिला आवडणाऱ्या पदार्थाबद्दल जेनेलिया म्हणाली की, पिठलं भाकरी तीला आवडते. त्यासोबत शेंगदाणा चटणीही रोजच्या जेवणात असते. हेच परफेक्ट डायट असल्याचेही तिने सांगितले. रीतेशही जेवणात मदत करतो का? यावर ती म्हणाली की, रितेश केक ‘लय भारी’ बनवतो.

मुलांच्या खाण्याच्या सवयीही साध्याच असून ते फास्टफूडपासून दुर राहतात. तेही घरी जे जेवण असेल तेच खातात. आठवड्यातून एखाद्या दिवशी ते पास्ता किंवा फास्टफूड खातात. तसेच, त्यांना चिप्सही घऱीच बनलेले आवडतात. त्यासाठी मी घरीच नाचणी आणि बटाट्याचे चिप्स, पापड देते, असेही जेनेलियाने सांगितले.

जेनेलियाच्या सॉसेज चिकन पुलावची रेसिपी

पॅनमध्ये एक चमचा तेल घालून त्यात तेलाची फोडणी करावी. त्यात जिरे घालावे. जिरे परतले की त्यामध्ये कांदा घालावा. कांदा गुलाबी रंगावर परतला की त्यामध्ये टोमॅटो घालावेत. त्यानंतर त्यामध्ये पावभाजी मसाला, लाल तिखट, हळद घालावी. मसाले परतले की, चिकन सोसेज घालावेत. चिकन सोसेज 10 मिनीटे शिजले की त्यामध्ये शिजवून घेतलेला मोकळा भात अंदाजाने घालावा. त्यावर कोथंबीर घालून सर्व्ह करावे.