Health Care : बिघडलेली जीवनशैली आणि जास्त वेळ काम केल्यामुळे कधीकधी अचानक अंगदुखी जाणवते, किंवा अचानक पाय दुखू लागतात. हे दुखणं कधीकधी असहय्य होऊन जातं. हिवाळ्यात तर या समस्या जरा जास्त जाणवू लागतात.

खरे तर या मागे अनेक कारणे असू शकतात. आपल्या शरीरात पोषणाचा अभाव असेल तरी सुद्धा अंगदुखी आणि पायदुखीची समस्या जाणवू शकते. त्यामुळे, स्वत:ची काळजी घेणे महत्वाचे आहे.

मात्र, ही अंगदुखी आणि पाय दुखण्याची समस्या वारंवार होत असेल तर यावर वेळीच उपचार करणे आणि यामागील कारणे शोधणे महत्वाचे आहे. चला तर मग जाणून घेऊयात ही कारणे कोणती आहेत?

झोपेचा अभाव

जर तुमची झोप कमी झाली तर तुम्हाला थकवा जाणून शकतो. यासोबतच तुम्हाला अंगदुखी, पाठदुखी आणि पाय दुखण्याचा ही त्रास जाणवू शकतो. त्यामुळे, पूर्ण झोप घेणे हे अतिशय महत्वाचे आहे.

१८ वर्षे किंवा त्यापुढील व्यक्तींनी रोज ७ तासांची पुरेशी झोप घेणे हे अतिशय महत्वाचे आहे. जर तुमची झोप व्यवस्थित झाली नाही की मग, अंगदुखी, थकवा आणि पायांमध्ये वेदना इत्यादी समस्या निर्माण होतात. यासोबतच झोप न झाल्यामुळे वजन वाढणे, डायबिटीज आणि हृदयरोगासारख्या समस्या निर्माण होऊ शकतात.

व्हिटॅमीन डी आणि कॅल्शिअमची कमतरता

शरीरात व्हिटॅमीन डी आणि कॅल्शिअमची कमतरता असणे हे अंगदुखी, पायांमध्ये वेदना होण्यामागचे प्रमुख कारण आहे. हे टाळण्यासाठी तुमच्या आहारात व्हिटॅमीन डी आणि कॅल्शिअमने युक्त असलेल्या खाद्यपदार्थांचा समावेश करा.

जर तुमच्या शरीरात कॅल्शिअमची कमतरता असेल तर रक्तातील कॅल्शिअमची पातळी कमी होण्याची शक्यता असते. यामुळे, हाडांमध्ये तीव्र वेदना निर्माण होतात. परिणामी अंगदुखीची समस्या वाढते.

शरीरात व्हिटॅमीन डी ची कमतरता असेल तर मग स्नायू दुखणे, कमकुवतपणा आणि हातापायांमध्ये पेटके येण्याची शक्यता वाढते.

पाण्याची कमतरता

जर तुम्ही कमी पाणी पिले तर याचा परिणाम तुमच्या संपूर्ण शरीरावर होतो. शरीरात पाण्याची कमतरता असेल तर थकवा जाणवणे, अशक्तपणा येणे आणि त्वचा निस्तेज दिसणे इत्यादी अनेक समस्या निर्माण होण्याची शक्यता असते.

जर तुमच्या शरीरात पाण्याची पातळी योग्य प्रमाणात नसेल तर रक्तातील ऑक्सिजनच्या पुरवठ्यावर याचा परिणाम होतो. त्यामुळे, पाठ, कंबर आणि पाय दुखण्याची शक्यता असते.