Home Remedies For Cleaning Washing Machine: मशिन व्यवस्थित कोरडं होऊ न देता लगेच झाकण लावल्याने त्यावर बुरशीही येते. कपडे स्वच्छ धुणारं वॉशिंग मशिनच कधी कधी एकदम कळकट होऊन जातं. म्हणूनच कमी मेहनतीत ते कसं झटपट स्वच्छ करायचं याचे हे काही खास उपाय.

टॉप लोड वॉशिंग मशिन स्वच्छ करण्याचे उपाय

१. व्हिनेगरच्या मदतीने वॉशिंग मशिन अगदी नव्यासारखे चमकवता येते. हा उपाय करण्यासाठी सगळ्यात आधी मशिनला हॉट टेम्परेचरवर सेट करा.

यानंतर मशिनमध्ये गरम पाणी टाका. त्यात साधारण ५ ते ६ टेबलस्पून एवढं व्हाईट व्हिनेगर टाका. मशिन खूप जास्त घाण झालं नसेल तर व्हिनेगर टाकणं पुरेसं आहे. पण जर मशिन खूपच काळवंडलं असेल तर मात्र व्हिनेगरसोबतच त्यात साधारण २ ते ३ टेबलस्पून एवढा बेकिंग सोडाही टाकावा.

२. हे दोन्ही टाकल्यानंतर ५ ते १० मिनिटांसाठी मशिन सुरू करा. त्यानंतर पुढचा एक तास मशिन झाकण लावून बंद ठेवा. त्यानंतर पुन्हा ५ मिनिटांसाठी मशिन चालू करा आणि नंतर मशिनमधले हे पाणी काढून टाका. पाणी निघून गेल्यानंतर एका कोरड्या सुती कपड्याने मशिन स्वच्छ पुसून घ्या.

३. सेमी ऑटोमॅटीक मशिन

जर तुमचे मशिन सेमी ऑटोमॅटीक प्रकारातले असेल किंवा ऑटोमॅटीक मशिन बाहेरच्या बाजूने स्वच्छ करायचे असेल तर ही पद्धत वापरू शकता.

यासाठी साधारण एक मग पाणी घ्या. त्यात ३ ते ४ टेबलस्पून व्हिनेगर आणि २ ते ३ टेबलस्पून बेकिंग सोडा टाका. हे मिश्रण मशिनवर आतून बाहेरून शिंपडा. ५ ते ७ मिनिटे तसेच राहू द्या. त्यानंतर स्वच्छ कपड्याने पुसून घ्या. रबरच्या घासणीने घासूनही तुम्ही स्वच्छ करू शकता. पण खूप जोरजोरात घासू नये.