लोकसभा निवडणुकीसाठी देशभरात तिसऱ्या टप्प्यातील मतदानाला आज सुरूवात झाली आहे. या निवडणुकीच्या 543 जागांसाठी देशात सात टप्प्यांमध्ये मतदान होणार आहे. तर 4 जून रोजी देशाचा पुढचा पंतप्रधान कोण हे ठरणार आहे.

अशात आज सुरू झालेल्या मतदानासाठी राज्यातील दिग्गज राजकीय नेत्यांसोबत अभिनेत्यांनीही आपला मतदानाचा अधिकार बजावला आहे.

माजी केंद्रीय कृषी मंत्री शरद पवार यांच्यासह पत्नी प्रतिभा पवार, राष्ट्रवादीच्या (शरदचंद्र पवार) उमेदवार सुप्रिया सुळे त्यांचे पती सदानंद सुळे आणि कन्या रेवती सुळे यांनी बारामती येथिल मतदान केंद्रावर मतदान केले. मतदानानंतर पवार-सुळे कुटुंबियांचा फोटो सध्या सोशल मीडियावर व्हारल होत आहे.ो

महाराष्ट्राचे उपमुख्यमंत्री अजित पवार यांनी बारामती लोकसभा मतदार संघात काटेवाडी येथे पत्नी आणि पक्षाच्या उमेवार सुनेत्रा पवार व आई आशाताई पवार यांच्यासह मतदान केले. यानंतर अजित पवार यांनी आपल्या अधिकृत एक्स अकाउंटवरुन मतदान केल्याचा फोटो शेअर केला आहे.

महाराष्ट्राचे माजी मुख्यमंत्री विलासराव देशमुख यांचे चिरंजीव अभिनेते रितेश देशमुख यांनी लातून लोकसभा मतदारसंघात मतदान केले. यावेळी रितेश यांच्यासोबत त्यांची आई आणि पत्नी जिनेलिया देशमुखही यांनी मतदान केले.

सोलापूर लोकसभा मतदारसंघात काँग्रेसच्या उमेदवार आमदार प्रणिती शिंदे आणि माजी केंद्रीय गृहमंत्री सुशिलकुमार शिंदे यांनी सोलापूरातील मतदान केंद्रावर मतदान केले.

यंदा प्रथमच लोकसभा लढवत असलेल्या प्रणिती यांच्यासमोर भाजपचे आमदार राम सातपुते यांचे आव्हान आहे.