Beed Loksabha election 2024 : बीड लोकसभा मतदारसंघामध्ये यावेळी चुरस बघायला मिळत आहे. भाजपच्या ज्येष्ठ नेत्या आणि उमेदवार पंकजा मुंडे यांनी वृत्तवाहिनीला मुलाखत देताना म्हटलं की, निकाल आपल्या हातात नसतो परंतु प्रयत्नांवर माझा विश्वास आहे. आम्ही शंभर टक्के प्रयत्न केले असून यश नक्कीच मिळेल, असा विश्वास त्यांनी व्यक्त केला.

सोमवार, दि. १३ मे रोजी बीडसह राज्यातील नंदूरबार, जळगाव, रावेर, जालना, छत्रपती संभाजीनगर, मावळ, पुणे, शिरुर, अहमदनगर, शिर्डी या मतदारसंघांमध्ये मतदान प्रक्रिया पार पडणार आहे. बीडमध्ये शरद पवार गटाचे उमेदवार बजरंग सोनवणे आणि पंकजा मुंडे यांच्यात तगडी फाईट झाल्याचं बघायला मिळालं.

रविवारी 'एबीपी माझा'शी बोलताना पंकजा मुंडे म्हणाल्या की, निवडणुकीमध्ये मी आणि माझ्या टीमने अथक परिश्रम घेतले आहेत. निकाल आपल्या हातात नसतो परंतु प्रयत्नांवर माझा विश्वास आहे. आम्ही ४५ दिवस प्रचारात व्यस्त होते.. यावेळी हसत-खेळत प्रचार पार पडला.

पंकजा मुंडे पुढे म्हणाल्या की, आमच्या परिश्रमामध्ये लोकांनी योगदान दिलं की मोहीम फत्ते होईल. धनंजय मुंडे आणि मी २००९ मध्ये लोकसभेला एकत्रित काम केलं होतं. त्यानंतर २०२४ मध्ये आम्ही पुन्हा एकत्र आलो. मधल्या काळात ज्या निवडणुका झाल्या त्यामध्ये आपलंच माणूस वाईट बोलतंय म्हटल्यावर टोचणी असायची. परंतु आता रिलॅक्स वाटत आहे.