नाशिक : नाशिक लोकसभेसाठी महायुतीमधील तिढा सुटत नसताना शांतीगिरी महाराज यांनी शिवसेनेतर्फे उमेदवारी अर्ज सादर करून उमेदवारीच्या गोंधळात उडी घेतली. मुख्यमंत्री एकनाथ शिंदे यांच्या सांगण्यावरुनच आपण हा अर्ज सादर केल्याची स्पष्टोक्ती त्यांनी दिल्यामुळे नाशिकच्या उमेदवारीला वेगळेच वळण मिळाले आहे.

त्यांना पक्षाकडून अधिकृत ‘एबी’ फॉर्म मिळालेला नसला तरी ३ मेपर्यंत एबी फॉर्म जमा करण्याची मुदत प्रशासनाने दिली आहे. दरम्यान, शांतीगिरी महाराजांना उमेदवारी देण्याविषयी शिवसेनेकडून कोणताही निर्णय झालेला नसल्याचे पक्षाचे जिल्हाप्रमुख अजय बोरस्ते यांनी सांगितले आहे. मात्र, नाशिकचा तिढा आणखी वाढला आहे.

भुजबळ, गोडसेंकडून उमेदवारीबाबत नकार

नाशिक : मुख्यमंत्री व दोन्ही उपमुख्यमंत्री पवार एकत्र नाशिकच्या उमेदवाराचे नाव जाहीर करतील. त्यानंतर ज्याचे नाव येईल त्याचा प्रचार करू, असे मंत्री छगन भुजबळ यांनी सांगितले. अफवांवर विश्वास न ठेवण्याचे आवाहन खासदार हेमंत गोडसे यांनी केले आहे.