नवी दिल्लीः राजस्थानच्या बिकानेर येथील एका भाजप पदाधिकाऱ्याने थेट पंतप्रधान मोदी यांच्याबद्दल एक विधान केलं होतं. त्या विधानामुळे भाजप पदाधिकाऱ्याची हकालपट्टी करण्यात आलेली आहे.

राजस्थानच्या बिकानेर जिल्ह्याचे भाजप अल्पसंख्याक आघाडीचे जिल्हाध्यक्ष उस्मान गनी यांनी नरेंद्र मोदी यांच्याबद्दल स्टेटमेंट दिलं होतं. मतदान करुन आल्यानंतर एका चॅनेलशी संवाद साधताना त्यांनी मोदींकडून मुस्लिमांबद्दल होत असलेल्या विधानाचा समाचार घेतला होता.

उस्मान गनी म्हणाले होते की, राजस्थानमध्ये तीन ते चार जागांवर भाजपचा पराभव होईल.. जे सत्य आहे ते सत्य आहे. मी कधीच सत्य नाकारत नाहीत. मुस्लिमांबद्दल मोदींनी केलेलं विधान मला आवडलेलं नाही. त्यामुळे मी त्यांना मेल करुन याबाबत विचारणा करणार आहे. कारण मुस्लिम लोक आम्हाला जाब विचारतात.

''पंतप्रधान नरेंद्र मोदी हे पक्षाचा सगळ्यात मोठा चेहरा आहेत. त्यांचं विधान मला आवडलं नाही. आम्हाला लोक विचारतात तेव्हा आम्ही काय उत्तरं द्यायची? मी अल्पसंख्याक सेलचा जिल्हाध्यक्ष आहे, जसा पक्षासाठी संघर्ष करतो तसा थेट बोलतो. भाजपचं काम चांगलं आहे परंतु निवडणुका आल्या की चुकीच्या पद्धतीने राजकारण केलं जातं'' असं उस्मान गनी बोलले होते. उस्मान गनी यांचा हा व्हिडीओ व्हायरल झाला होता. त्यानंतर भाजपने त्यांच्यावर निलंबनाची कारवाई केली आहे.