कऱ्हाड : कऱ्हाड (जि. सातारा) तालुक्यातील खोडशी गावातील (Khodshi Village) ग्रामस्थांनी घातलेला मतदानावरील बहिष्कार कायम ठेवला आहे. प्रशासनाने दिलेला प्रस्ताव धुडकावत खोडशी गावाच्या हद्दीतील शासकीय गायरान जमिनीवरील प्लॉट धारकांना प्लॉट वाटप केले जात नाही, या मुद्द्यावर मतदानावर घातलेला बहिष्कार कायम आहे.

खोडशीतील शासकीय जमिनीवर अतिक्रमण प्रश्न प्रशासकीय यंत्रणेने तो सोडविण्यापेक्षा त्याचा नाहक गुंता वाढवला आहे. याच जमिनीवर वास्तव्य करणाऱ्यांना प्लॉट वाटप करण्याची चालढकल केली जात आहे. यावरुन ग्रामसभेतही चर्चा झाली होती. प्रशासकीय यंत्रणा सहकार्य करत नाही, असा आरोप करत तेथील काही ग्रामस्थांनी सामाजिक ऐक्य जोपासणाऱ्या खोडशी गावात प्लॉट वाटप हा प्रश्न निकाली निघाला की हेच ऐक्य अधिक वाढणार आहे.

संबंधित प्लॉट वाटप व्हावे अशी मागणी करुन लोकसभेच्या निवडणुकीत मतदानावर बहिष्कार टाकण्याचा निर्णय घेतला होता. तो निर्णय तेथील संबंधित ग्रामस्थांनी कायम ठेवून मतदानावर बहिष्कार घालण्याचा निर्णय तेथील मतदारांनी कायम ठेवला आहे.