Loksabha election 2024 : सातारा लोकसभा मतदारसंघाचे महायुतीचे उमेदवार उदयनराजे यांच्या प्रचारार्थ पंतप्रधान नरेंद्र मोदी यांच्या सभेचं आयोजन करण्यात आलेलं होतं. यावेळी पंतप्रधानांनी संविधान बदलाच्या आरोपांवर पलटवार करत काँग्रेसकडून कर्नाटकमध्ये संविधान बदलण्याचा प्रयत्न सुरु असल्याचा आरोप केला आहे.

साताऱ्यात बोलताना पंतप्रधान नरेंद्र मोदी म्हणाले की, मोदीने आर्टिकल ३७० कब्रस्थानमध्ये गाडलं आहे. ते पुन्हा लागू करण्याची हिंमत कुणामध्येच नाहीये. ३७० हटवल्यामुळे देशाची शान वाढली असून देशाच्या एकात्मतेला ताकद मिळाली आहे.

मोदी पुढे म्हणाले की, काँग्रेसकडून भाजपवर संविधान बदलण्याचा आरोप होतो आहे. परंतु डॉ. बाबासाहेब आंबेडकर यांच्या संविधानाला धक्का लावण्याची हिंमत कुणामध्येच नाहीये. उलट काँग्रेसने कर्नाटकमध्ये धर्माच्या आधारावर आरक्षण देऊन संविधान बदलण्याचा प्रयत्न केला आहे.

कर्नाटकमध्ये काँग्रेसने फतवा काढून मुस्लिमांना ओबीसीमधून आरक्षण दिलं आहे. धर्माच्या आधारावर आरक्षण देणं हे संविधानविरोधी आहे. जोपर्यंत मोदी जिंवत आहे तोपर्यंत संविधान बदलण्याचा प्रयत्न कुणीही करु शकणार नाही, हे लिहून घ्या; असा सज्जड दम मोदींनी दिला.