उस्मानाबाद : महाराष्ट्रातील दोन बलाढ्य नेत्यांचे वारसदार व नातेसबंधाने अत्यंत जिव्हाळ्याचे संबध असलेले राणाजगजितसिंह पद्मसिंह पाटील व पार्थ अजित पवार यंदा लोकसभेमध्ये नशीब अजमवणार आहेत. पार्थ पवार हे माजी मंत्री व ज्येष्ठ नेते डॉ. पद्मसिंह पाटील यांचा भाचा तर राणाजगजितसिंह पाटील यांचे आतेभाऊ आहेत. पार्थ पवार हे मावळमधून आणि राणाजगजितसिंह पाटील हे उस्मानाबाद मतदारंसघातून लोकसभा निवडणुकीच्या मैदानात उतरले आहेत. 

सुरवातीपासुन राजकारणात शरद पवार यांचे खंदे समर्थक म्हणून डॉ. पद्मसिंह पाटील यांचे नाव अग्रक्रमाने घेतले जाते. या संबधाचे पुढे नातेसबंधामध्ये रुपांतर झाले. डॉ. पद्मसिंह पाटील यांच्या बहिण सुनेत्रा यांचा विवाह अजित पवार यांच्याशी झाला. तेव्हापासुन हे दोन्ही घराणे अधिक जवळ आले. डॉ. पद्मसिंह पाटीला यांनी शरद पवार यांच्याबरोबर राज्याच्या मंत्रिमंडळामध्ये अनेक महत्वाच्या पदावर काम केले. पुढे अजित पवार यांचाही राजकारणात प्रवेश झाला. डॉ. पाटील यांचे वारसदार म्हणून राणाजगजितसिंह पाटील यांनी राजकारणात उडी घेतली. 

राणाजगजितसिंह पाटील यांची राजकारणात एंट्रीसुद्धा राज्यमंत्री पदाने झाली. पुढे त्यांनीही राज्यामध्ये अजित पवार यांच्या नेतृत्वाखाली काम केले. आज अजित पवार यांचे चिरंजीव पार्थ मावळमधुन पहिल्यांदा लोकसभा निवडणुक लढवत असताना उस्मानाबाद लोकसभा निवडणुकीसाठी राणाजगजितसिंह पाटील हेही पहिल्यांदाच या निवडणुकीला तोंड देत आहेत. या दोन्ही घराण्यांसाठी हा अत्यंत चांगला योगायोग मानला जात असून, आतेभाऊ व मामेभाऊ एकाचवेळी लोकसभेच्या आखाड्यात उतरल्याने याची चांगलीच चर्चा राज्यभरामध्ये होत आहे. ही लढत दोन्ही घराण्यांसाठी प्रतिष्टेची असून, या नव्या पिढीचाही राजकीय अध्याय कसा राहणार, याकडेही सर्वांचे लक्ष लागुन राहिले आहे. गेल्या कित्येक वर्षांपासूनच जिव्हाळ्याचे नात्यांबरोबरच राजकीय संबधसुध्दा अधिक दृढ होत आहेत. त्याला आता लोकसभेची देखील किनार मिळाली आहे.