Mumbai University Election : मुंबई विद्यापीठ सिनेट निवडणुकांना सरकारने स्थगिती दिली आहे. या निवडणुकीसाठी मनसे आणि ठाकरे गटाने मोठी तयारी केली होती. आदित्य ठाकरे आणि अमित ठाकरे या निवडणुकीसाठी थेट मैदानात उतरले होते.

मुंबई विद्यापीठ सिनेट निवडणुकीमधला एक वजनदार नेता आज ठाकरेंना सोडून शिंदेंच्या शिवसेनेमध्ये दाखल झालेला आहे. त्या नेत्याचं नाव आहे प्रवीण पाटकर. प्रवीण पाटकर हे आदित्य ठाकरेंचे अत्यंत जवळचे समजले जात होते. परंतु त्यांनी आज एकनाथ शिंदे यांचं नेतृत्व स्वीकारत शिवसेनेत प्रवेश केला.

प्रवीण पाटकर यांच्या पक्षप्रवेशामुळे ठाकरेंना सिनेट निवडणुकांमध्ये मोठा फटका बसू शकतो. सिनेट निवडणुकांमध्ये प्रवीण पाटकर यांनी मोठ्या प्रमाणात सदस्य नोंदणी केली होती याचा फायदा शिवसेनेला मागच्या सिनेट निवडणुकीत झाला होता. युवा सेनेतील अंतर्गत कलहा मुळेच प्रवीण पाटकर यांनी ठाकरेंना सोडचिठ्ठी देत शिवसेनेत प्रवेश करत असल्याचे सांगितले जात आहे. श्रीकांत शिंदे यांच्या उपस्थितीत पाटकर यांनी प्रवेश केला.

विद्यापीठाने जाहीर केलेली निवडणूक येत्या १० सप्टेंबरला होणार होती. या निडणुकीसाठी ठाकरे आणि मनसेने चांगली तयारी केली होती. मात्र रातोरात पत्रक काढून निवडणूक स्थगित केल्यामुळे विद्यार्थ्यांमध्ये प्रचंड नाराजी वाढली आहे.

अमित ठाकरे यांचीही ही पहिलीच निवडणूक होती. त्यामुळे त्यांच्या नेतृत्वाचीही कसोटी लागणार होती. मात्र, विद्यापीठाने निवडणुकीला स्थगिती देण्याचा निर्णय घेतला. विद्यार्थी संघटनेत आश्चर्य व्यक्त केलं जात आहे. भाजप-शिंदे गटातील तयारी अपूरी पडल्यामुळे हा निर्णय झाला का?, अशी चर्चा रंगली आहे.