सतत या ना त्या कारणाने चर्चेत राहणारा बिगबॉस फेम अभिजीत बिचुकले पुन्हा एकदा चर्चेत आला आहे. त्याने आता थेट मुख्यमंत्री एकनाथ शिंदे यांनाच पत्र लिहिलं आहे. ही मागणी महिलांसाठी महत्त्वाची असल्याचंही बिचुकलेने म्हटलं आहे.

मुख्यमंत्री एकनाथ शिंदे यांनी लिहिलेल्या पत्रात बिचुकलेने सिलेंडरच्या किमती कमी करण्याची मागणी केली आहे. एसटी बसमधून प्रवास करणाऱ्या महिलांना ५० टक्के सवलत दिलीये, सिलेंडरच्या किमतीतही सवलत द्यावी, अशी मागणी बिचुकलेने केली आहे.

या पत्रात बिचुकलेने लिहिलं आहे की, महिला वर्गाला एसटी बसच्या प्रवासासाठी ५० टक्के सवलत दिली. त्याबद्दल सरकारचं अभिनंदन. याचा आनंदच आहे. पण खऱ्या अर्थाने विचार केला तर सर्वसामान्य , गरीब, उच्चवर्णीय महिलांसाठी दैनंदिन जिव्हाळ्याचा विषय म्हणजे राज्यातल्या गॅस सिलेंडरच्या दरातली प्रचंड वाढ.

नवीन मराठी वर्षानिमित्त जर नागरिकांसाठी काही चांगलं करायचं असेल तर सामाजिक कार्यकर्ता म्हणून मी विशेष सूचना करतोय. महाराष्ट्र राज्यातल्या गॅस सिलेंडरची किंमत ५०० रुपये करावी. राज्य शासनाच्या कोट्यातून सिलेंडरच्या किमतीत ५० टक्के अनुदान किंवा सवलत जाहीर करावी म्हणजे म्हणता येईल की खऱ्या अर्थाने गरीबांची तसंच महिलांची दक्षता घेणारं हे सरकार आहे, अशी सूचना अभिजीत बिचुकलेने पत्राद्वारे राज्य सरकारला केली आहे.