सातारा : महाराष्ट्र केसरी कुस्ती (Maharashtra Kesari Kusti) स्पर्धा (Competition) साताऱ्यातील (Satara) श्रीमंत छत्रपती शाहू जिल्हा क्रीडा संकुलात आजपासून (मंगळवार) रंगणार आहे. याच पार्श्वभूमीवर शिवसेना नेत्या अभिनेत्री दिपाली सय्यद (Deepali Sayyad) यांनी आज शरद पवार (Sharad Pawar) यांची नवी दिल्लीत भेट घेतली. दरम्यान, दिपाली सय्यद यांनी शरद पवारांकडं महाराष्ट्रात महिला कुस्ती स्पर्धा भरवण्याची मागणी केलीय.

आता शरद पवार दिपाली सय्यद यांच्या मागणीवर काय निर्णय घेतात हे पाहणं महत्वाचं ठरणार आहे. दिपाली सय्यद यांनी मार्च महिन्यात सोलापूरमध्ये देखील यासंदर्भात भूमिका मांडली होती. दरम्यान, आता दिपाली सय्यद यांनी शरद पवारांना एक पत्र लिहिलीय, या पत्रात त्यांनी त्यांची भूमिका स्पष्ट केलीय. दिपाली सय्यद यांनी शरद पवारांना लिहिलेल्या पत्रात म्हंटलंय, आदरणीय साहेब.. सर्व प्रथम महाराष्ट्र केसरी सुरू करून आपण कुस्तीगीरांना न्याय मिळवून दिलात या करिता आपली खूप आभारी आहे. दिपाली भोसले सय्यद चॅरिटेबल ट्रस्टच्या माध्यमातून आम्ही आपल्या कार्यात महिला कुस्तीगिरांच्या प्रगतीसाठी, तसंच महिला कुस्तीगिरांच्या शासकीय सेवा अशा अनेक विषयांत हातभार लावू इच्छितो. आपल्या महाराष्ट्र राज्य कुस्तीगीर परिषदेमार्फत विविध राज्यस्तरीय महिला कुस्ती स्पर्धा घेतल्या जातात, परंतु पुरूष महाराष्ट्र केसरीप्रमाणे स्वतंत्र महिला महाराष्ट्र केसरी स्पर्धा होत नाही याची खंत आहे.

महाराष्ट्राला पुरुष महाराष्ट्र केसरी विचारले, तर जगजाहीर आहे तसंच जर महिला महाराष्ट्र केसरी कोण? तरी अद्याप माहिती नाही. आदरणीय साहेब आपणांस विनंती आहे की, पुरुष महाराष्ट्र केसरीप्रमाणं स्वतंत्रपणे महिला महाराष्ट्र केसरीची नवीन ओळख महिला कुस्तीगीरांना मिळावी, हाच एकमेव उद्देश साध्य व्हावा याचसाठी हे प्रयोजन, असं त्यांनी पत्रात नमूद केलंय. महाराष्ट्रात महिलांसाठी स्वतंत्र महाराष्ट्र केसरी स्पर्धा होत नाही, ही खंत असल्याचंही मत दिपाली सय्यद यांनी व्यक्त केलं.