Eknath Shinde : अभिनेता प्रभासचा आदिपुरुष हा चित्रपट शुक्रवारी सकाळी देशभरातील चित्रपटगृहांमध्ये प्रदर्शित झाला. या चित्रपटातील रावण, भगवान राम, हनुमानजी आदी व्यक्तिरेखांबाबत बराच वाद आहे. सोशल मीडियावर त्यांच्या डायलॉग्सचीही जोरदार चर्चा आहे. ट्विटरवर एका यूजरने चित्रपटाशी संबंधित एक छायाचित्र ट्विट केले, त्यानंतर ठाणे पोलिसांनी कारवाई केली आहे.

अभय नावाच्या एका ट्विटर युजरने महाराष्ट्राचे मुख्यमंत्री एकनाथ शिंदे यांच्या फोटोसह चित्रपटातील एका पात्राचा फोटो ट्विट केला आहे.

त्यानी लिहिले की, आदिपुरुष चित्रपटात एकनाथ शिंदेही आहेत हे मला माहीत नव्हते. आदिपुरुषशी संबंधित सर्व हॅशटॅग टॅग करत अभयने एकनाथ शिंदे यांच्या अकाउंटलाही टॅग केले. त्यानंतर लगेचच ठाणे शहर पोलिसांनी उत्तर देत त्याचा संपर्क क्रमांक मागितला.

याप्रकरणी पोलिस नेटकऱ्याच्या शोधात आहेत. पोलिसांनी ट्वीटरवर त्याचा नंबर देखील मागितला आहे.

ट्विटर यूजर अभयचे हे ट्विट सोशल मीडियावर व्हायरल झाले आहे. साडेसहा लाखांहून अधिक ट्विटला व्ह्यूज मिळाले आहेत. याशिवाय, १६८७ हून अधिक रिट्विट्स झाले आहेत. २७७ हून अधिक वापरकर्त्यांनी ट्विटचा हवाला देऊन प्रतिक्रिया दिल्या आहेत.