शिवसेनेत (Shiv Sena) आतापर्यंतचं सर्वात मोठं बंड झालं. एकनाथ शिंदे यांच्यासोबत सेनेच्या 40 आमदारांनी बंडखोरी केल्यानं राज्यातील महाविकास आघाडी सरकार कोसळलं. यानंतर राज्यात एकनाथ शिंदे आणि देवेंद्र फडणवीस यांनी मिळून सत्ता स्थापन केली. या सत्तांतरासोबतच राज्यातील राजकारणात अनेक मोठे बदल पहायला मिळत आहेत.

एकनाथ शिंदे (Eknath Shinde) गट हा आपण असलेली शिवसेनाच खरी शिवसेना असल्याचं सांगत आहे, तर दुसरीकडं ठाकरेंकडून त्याला विरोध होत आहे. ठाकरे विरुद्ध शिंदे गट यांच्यातील संघर्ष आता सुप्रीम कोर्ट आणि राज्य निवडणूक आयोगाच्या दारात आहे. दरम्यान, शिवसेनेचा बालेकिल्ला असलेल्या रत्नागिरीत आज भाजपचे केंद्रीय मंत्री नारायण राणे (Narayan Rane) आणि अजयकुमार मिश्रा (Ajay Kumar Mishra) हे दोन मंत्री दाखल झाले. यावेळी शिवसेना पक्षप्रमुख उद्धव ठाकरे (Uddhav Thackeray) यांच्यावर मिश्रा यांनी हल्लाबोल केलाय.

उद्धव ठाकरेंनी महाराष्ट्राच्या जनतेच्या पाठीत खंजीर खूपसला त्याचं फळ त्यांना मिळालेलं आहे, असं मिश्रांनी म्हटलंय. यावेळी केंद्रीय मंत्री मिश्रा यांनी कणकवलीमध्ये नितेश राणेंच्या घरी भेट देत माध्यमांशी संवाद साधला. ते म्हणाले, भाजपकडून कधीच सरकारी यंत्रणांच्या कामात हस्तक्षेप केला जात नाही. ज्यांना या देशाची प्रगती पाहवत नाही, भाजपची लोकप्रियता आवडत नाही तेच लोक भाजपवर आरोप करत आहेत. भाजपाध्यक्ष जे. पी. नड्डा यांच्या वक्तव्याचा विपर्यास करण्यात आल्याचंही मिश्रा यांनी स्पष्ट केलं.