मुंबई : सत्तांतर झाल्यानंतर शिंदे फडणवीस सरकारचे पहिलेच पावसाळी अधिवेशन सध्या मुंबईत पार पडत आहे. अधिवेशनाचा आज पाचवा दिवस असून मागचे चारही दिवस वादळी ठरले आहेत. दरम्यान आज सभागृहात विरोधीपक्षनेते अजित पवारांच्या काटेकोर स्वभावाचे दर्शन पुन्हा एकदा झाले आहे. चूक झालेल्या एका अधिकाऱ्याला अजित पवारांनी चांगलंच झापलं असून थेट निलंबन करण्याची मागणी केली आहे.

(Opposition Leader Ajit Pawar In Monsoon Session)

दरम्यान, विरोधीपक्षनेते अजित पवार सभागृहात बोलत असताना त्यांना दिलेल्या एका निवेदनातील कागदपत्रांमध्ये विधानसभा ऐवजी विधानपरिषद असा उल्लेख करण्यात आला होता. त्यानंतर अशी निष्काळजी करणाऱ्याला अजित पवारांनी चांगलंच झापलं आहे. "आपण विधानसभेत आहोत, ही विधानपरिषद नाही याचं भान ठेवा. ज्या कुणाकडून ही चूक झाली आहे त्याला सरकार सातव्या वेतन आयोगानुसार वेतन देतंय, तुम्ही फुकट कामं नाही करत. ज्यांच्याकडून ही चूक झाली आहे त्यांना दिलगिरी व्यक्त करायला लावा, परत असं होता कामा नये, नाहीतर त्यांना निलंबित करा." अशा शब्दांत अजित पवारांनी सुनावले आहे.

याप्रकरणानंतर शिंदे गटाचे प्रवक्ते दीपक केसरकरांनी संबंधित चूक करणाऱ्या अधिकाऱ्यावर चौकशी करून कारवाई करण्याचे आश्वासन दिले. दरम्यान अजित पवारांचा रागीट पण तेवढ्याच शिस्तप्रिय स्वभावाचे दर्शन आज पुन्हा झाले आहे. या घटनेचा व्हिडिओ सध्या सोशल मीडियात प्रचंड व्हायरल होत आहे.