मुंबईः राष्ट्रवादी काँग्रेसमध्ये बंड झाल्यानंतर पक्षाच्या नवनिर्वाचित कार्याध्यक्ष सुप्रिया सुळे यांनी बंडखोर आमदारांवर कारवाईचे संकेत दिलं आहेत. रात्री उशिरा सुळे यांनी पत्रकार परिषद घेतली.

अजित पवार यांच्यासह राष्ट्रवादीच्या ९ आमदारांनी आज मंत्रिपदाची शपथ घेतली. शरद पवार यांनी आमदारांवर कारवाईसंबंधी भाष्य केलं नसले तरी सुनिल तटकरे आणि प्रफुल्ल पटेल यांच्यावर कारवाई होईल, असं म्हटलं आहे.

दरम्यान, सुप्रिया सुळे यांनी रात्री उशिरा पत्रकार परिषद घेऊन मंत्रिपदाची शपथ घेणाऱ्या राष्ट्रवादीच्या आमदारांवर कारवाईसंदर्भात भाष्य केलं आहे. सुळे म्हणाल्या की, राष्ट्रवादीमधील शपथ घेणाऱ्या आमदार विरोधात अपात्रतेची कारवाई करावी, यासाठी हालचाली सुरु झालेल्या आहेत. या आमदारांविरोधात अपत्रतेची याचिका अध्यक्षांकडे दाखल करण्यात येणार आहे. सुळेंच्या या विधानाने बंडखोरांवर अपात्रतेची कारवाई होऊ शकते, असं दिसून येतंय.

सुप्रिया सुळे पुढे म्हणाल्या की, अजितदादा आणि माझ्यात भांडण होणारच नाही. आमचं इमोशनल नातं आहे. विचार वेगळे असतील परंतु नातं कायम आहे.

बंडाबद्दल बोलतांना सुप्रिया सुळे म्हणाल्या की, पवार साहेब एखाद्या विषयावर बोलल्यानंतर माझ्यासारख्या लहान कार्यकर्त्याने बोलणं योग्य नाही. पवार साहेब याच्यावर बोलले आहेत. पक्षाची लाईन क्लिअर आहे.

छगन भुजबळ यांनी बोलतांना शरद पवार नरेंद्र मोदींबद्दल बोलल्याचं सांगितलं होतं. त्यावर सुळे म्हणाल्या की, भूजबळ साहेबांना पवार साहेबांनी तसं सांगितलं असेल तर मी ही गोष्ट ऐकलेली नाही. दादा माझा भाऊ आहे म्हणून आयुष्यभर त्यांच्यासोबत राहणार आणि पवार साहेब वडील आहेत म्हणून त्यांच्यासोबतही आयुष्यभर राहणार, नातं कायम राहणार.

सुप्रिया सुळे पुढे म्हणाल्या, बंड झालं त्याला बारा तासही उलटले नाही. त्यामुळे पुढे काय-काय होतं ते बघू. आज सकाळी दादासोबत मी तीन तास होते. देवगिरीवर दादाची भेट झाली. पण भाऊ-बहिणीत काय चर्चा झाली ते सांगणार नाही.