मुंबईः राष्ट्रवादी काँग्रेसमध्ये आज महाभूकंप बघायला मिळाला. अजित पवार यांनी राष्ट्रवादी काँग्रेसमधले काही आमदार घेऊन शपथविधी पूर्ण केला. राष्ट्रवादीच्या ९ आमदारांनी आज मंत्रिपदाची शपथ घेतली. शरद पवारांनी या बंडानंतर आक्रमक पवित्रा घेतला असून सुनिल तटकरे आणि प्रफुल्ल पटेल यांच्यावर कारवाईचे संकेत दिले आहे.

राजकीय विश्लेषक आजच्या बंडाचे राजकीय अर्थ काढत आहेत. ही खेळी भाजपला अंगलट येईल, असं काहींचं म्हणणं आहे. तर काहीजण बंडखोरांच्या भविष्याबद्दल चिंता व्यक्त करीत आहेत. शरद पवार यांनी तर बुधवारी राज्यातील पदाधिकाऱ्यांची बैठक बोलावल्याने कोण कुणासोबत, हे स्पष्ट होणार आहे.

देशातल्या आणि राज्यातल्या राजकीय विश्लेषकांचं आणि दिग्गज पत्रकारांचं आजच्या राजकीय भूकंपाकडे बारकाईने लक्ष होतं. मागच्या अनुभवांवरुन थेटपणे मत मांडली जात नसली तरी या खेळीवरुन काय घडू शकतं अथवा भाजपने काय साध्य केलं? अशा बोलक्या प्रतिक्रिया आलेल्या आहेत.

ज्येष्ठ पत्रकार राजदीप सरदेसाई म्हणतात, 'ना खाऊंगा, ना खाने दुंगा' या भाजपच्या भ्रष्टाचारविरोधी विचारांचं काय झालं? ज्यांनी मंत्रीपदाची शपथ घेतली आहे ते मुळात दोषीच नाहीत असं ते म्हणत असतील.

पत्रकार धवल कुलकर्णी म्हणातात, महाराष्ट्राच्या 'गेम ऑफ थ्रोन्स'च्या ताज्या एपिसोडमध्ये अजित पवार राष्ट्रवादीतून फुटून उपमुख्यमंत्री झाले आहेत. या खेळातील प्रमुख खेळाडूंवर काय परिणाम होतो, हे बघावं लागेल.

पत्रकार बरखा दत्त यांनी म्हटलं की, शरद पवार आणि उद्धव ठाकरे यांनी एकत्र येत सत्तास्थापन केली होती. आता अजित पवारांनी बंड केलं खरं परंतु हे शरद पवारांच्या संमतीने केलं की त्यांच्या अपरोक्ष...

पत्रकार निखिल वागळे ट्वीट करुन म्हणतात, ज्यांनी ७०००० कोटींचा घोटाळा केल्याचा आरोप मोदींनी केला त्यांनाच आपल्या मंत्रिमंडळात भाजपने घेतलं आहे! जय हो दुटप्पीपणा… दादांची खेळी काकांना ठाऊक होती का नाही याचा गौप्यस्फोट आणखी काही वर्षांनी होईल!