Amit Thackeray on Uddhav Thackeray : शिवसेनेच्या वर्धापन दिन कार्यक्रमामध्ये उद्धव ठाकरे यांनी राज ठाकरेंवर सडकून टीका केली होती. केवळ उद्धव ठाकरे नको म्हणून काहींनी 'बिनशर्ट' पाठिंबा दिला. त्यांनी शर्ट काढून, उघडं होऊन पाठिंबा दिल्याची बोचरी टीका राज ठाकरे यांच्यावर केली होती.

''याच्यासाठी आम्ही बिनशर्त पाठिंबा दिला नव्हता'' असं उत्तर राज ठाकरे यांचे सुपुत्र अमित ठाकरे यांनी दिलं आहे. वरळीतल्या बैठकीनंतर ते माध्यमांशी बोलत होते. अमित ठाकरे वरळीतून लढणार, अशी चर्चा आहे. मनसेने विधानसभेची तयार सुरु केल्याचंही दिसून येतंय.

अमित ठाकरे म्हणाले की, आम्ही विधानसभेची तयारी सुरु केली आहे. पहिली बैठक वरळी आणि आता सगळीकडे बैठक घेणार आहोत. आदित्य ठाकरेंवर बोलताना ते म्हणाले, शेवटचे तीन महिने काम करुन काही होत नाही, एका आमदाराला पाच वर्षे मिळतात.. मात्र पाच वर्षात आणि कोविड काळात या ठिकाणी काही काम झालेलं नाही. यांच्यासाठी आम्ही त्यांना बिनशर्त पाठिंबा दिला नव्हता, असं अमित म्हणाले.

उद्धव ठाकरेंच्या 'बिनशर्ट'च्या टीकेवर बोलताना अमित ठाकरे म्हणाले की, त्यांना ते समजावून सांगायला दहा मिनिटं लागली. त्यांना आम्ही वरळीत बिनशर्त पाठिंबा दिला हे दिसलं नव्हतं का? त्यांनी बिनशर्त पाठिंबा घेतला आणि मुलाला आमदार केले.. राज ठाकरेंनी स्वत:चा पक्ष काढला आणि वाढवलाय, अशीही बोचरी टीका अमित ठाकरेंनी केली.