मुंबई : ईडीने मंत्री नवाब मलिकांना (Nawab Malik) आज सकाळीच त्यांच्या घरातून ताब्यात घेतले. त्यांची ईडी कार्यालयात तब्बल आठ तास चौकशी करण्यात आली. त्यानंतर मंत्री नवाब मलिकांना ईडीने अटक (ED Arrested Nawab Malik) केली. त्यावरूनच राष्ट्रवादीचे खासदार अमोल कोल्हे (Amol Kolhe) यांनी कविता करत भाजपवर टीका केली आहे. (Amol Kolhe on Nawab Malik ED Enquiry)

''भाजप सत्तेसाठी ईडीचा वापर करत असून विनाकारण नेत्यांवर ईडीची छापेमारी केली जात आहे. राज्यातील महाविकास आघाडी सरकार भाजपच्या नजरेत खुपतेय. त्यामुळे ईडीची कारवाई होतेय. तपास यंत्रणा ईडीच्या सालगडी बनल्या असून भाजपमध्ये काहीच घोटाळे नाहीत का?'' असा सवाल खासदार अमोल कोल्हेंनी उपस्थित केला आहे.

अमोल कोल्हेंची कविता नेमकी काय? -

सत्तेच्या माडीसाठी

ईडीची शिडी

विनाकारण मारी

धाडीवर धाडी

सलते सत्तेवरील

महा-आघाडी

म्हणून कमळाबाई

ती लाविते काडी

तपासयंत्रणा झाल्या

कमळीच्या सालगडी

पाकळ्यांमध्ये नाहीत का

काहीच भानगडी?

पण लक्षात ठेवा...

पुरून उरेल सर्वांना

रांगडा राष्ट्रवादी गडी

फडणवीसांनी केले आरोप -

नवाब मलिकांनी काही दिवसांपूर्वी एनसीबीचे माजी अधिकारी नवाब मलिकांवर आरोप केले होते. त्यानंतर देवेंद्र फडणवीसांवर देखील त्यांनी आरोप केले. मलिकांनी बॉम्बस्फोटातील आरोपींकडून जमीन खरेदी केल्याचा आरोप फडणवीसांनी केला होता. त्याच आरोपाचा ठपका ठेवत आज ईडीकडून नवाब मलिकांना अटक करण्यात आली आहे.