मुंबई : तुषार भोसलेंमुळेच अजित पवार यांचे भाषण झाले नाही, असा आरोप राष्ट्रवादी काँग्रेस पक्षाचे आमदार अमोल मिटकरी (Amol Mitkari) यांनी केला आहे. पंतप्रधान कार्यालयाकडून पाठवलेल्या कार्यक्रम पत्रिकेवर भाजप आध्यात्मिक आघाडीचे प्रदेशाध्यक्ष तुषार भोसले (Tushar Bhosale) यांची सही आहे. त्यामुळे हा नवीन वाद निर्माण झाला आहे. अजित पवार हे पुणे जिल्ह्याचे पालकमंत्री आहेत. या प्रकरणी देवेंद्र फडणवीस (Devendra Fadnavis) यांनी माफी मागावी, अशी मागणी मिटकरी यांनी प्रसारमाध्यमांशी बोलताना केली आहे. (Amol Mitkari Allegation On Tushar Bhosale Not Allowing For Speech At Dehu Of Pune)

देहू येथे १४ जून रोजी संत तुकाराम महाराज यांच्या शिळा मंदिराचे लोकार्पण पंतप्रधान नरेंद्र मोदी यांच्या हस्ते झाले. या प्रसंगी उपमुख्यमंत्री अजित पवार यांना भाषण करु दिले गेले नाही, असा दावा खासदार सुप्रिया सुळे यांनी केला होता. त्यावरुन राज्यात नवीन राजकीय वाद सुरु झाला आहे.

तुषार भोसले म्हणाले, की पंतप्रधान कार्यालयाने आम्हाला टेंटीव्ह कार्यक्रम मागवला होता. अजित पवार हे मुख्यमंत्र्यांचे प्रतिनिधी म्हणून देहूतील कार्यक्रमाला आले होते. तीन दिवस अगोदर जिल्हाधिकाऱ्यांच्या मार्फत पवार यांचे नाव मुख्य सचिवांकडे पाठवण्यात आले. त्यानंतर ते पंतप्रधान कार्यालयाकडे पाठवले गेले, असे भोसले यांनी प्रसारमाध्यमांना सांगितले.