मुंबई - शिवसेना आणि अमृता फडणवीस यांच्यातला वाद पुन्हा पेटण्याची शक्‍यता आहे. ऍक्‍सिस बॅंकेतली खाती राष्ट्रीयीकृत बॅंकांमध्ये वळती करण्याच्या मुद्द्यावरून अमृता फडणवीसांनी अप्रत्यक्षपणे शिवसेनेवर निशाणा साधला आहे. राज्याला वाईट नेते मिळणं ही महाराष्ट्राची चूक नाही, असे ट्‌विट अमृता फडणवीसांनी केले आहे. 

ताज्या बातम्यांसाठी डाऊनलोड करा ई-सकाळचे ऍप

माजी मुख्यमंत्री देवेंद्र फडणवीस यांना टार्गेट केले जात असल्याची प्रतिक्रिया अमृता फडणवीस यांनी एका दैनिकाला मुलाखतीत दिली होती. ऍक्‍सिस बॅंकेतून वळत्या केल्या जाणाऱ्या खात्यांबद्दलही त्यांनी भाष्य केले होते. सरकारच्या निर्णयाचा सर्वसामान्यांवर परिणाम होत असेल तर शांत बसणार नाही, असेही त्या म्हणाल्या होत्या. नव्या सरकारने ऍक्‍सिस बॅंकेतील महाराष्ट्र पोलिसांचे सॅलरी अकाऊंट्‌स राष्ट्रीयीकृत बॅंकेकडे वळविण्यात येणार असल्याची चर्चा आहे. सध्या पोलिस खात्यातील 2 लाख कर्मचाऱ्यांचे वेतन खाते ऍक्‍सिस बॅंकेत आहेत. पोलिसांच्या खात्यातून ऍक्‍सिस बॅंकेत वर्षाला 11 हजार कोटींची उलाढाल होते.

मंत्रिमंडळ विस्तारातील संभाव्य नेत्यांची यादी फुटली?

मात्र, हे पोलिस खातेदार ऍक्‍सिस बॅंकेला गमवावे लागू शकतात, अशी माहिती आहे. विशेष म्हणजे हा घटनाक्रम शिवसेना आणि ऍक्‍सिस बॅंकेच्या वरिष्ठ अधिकारी आणि अमृता फडणवीस यांच्यातील शाब्दिक युद्धानंतर घडला आहे. उद्या मंत्रिमंडळ विस्तार आहे, त्यानंतर ठाकरे सरकारकडून ऍक्‍सिस बॅंकेतून पोलिसांची खाती वळविण्याचा निर्णय होण्याची शक्‍यता आहे. देवेंद्र फडणवीस यांच्या पत्नी अमृता फडणवीस या ऍक्‍सिस बॅंकेत उप-संचालक पदावर कार्यरत आहेत. फडणवीस यांनी पदाचा गैरवापर करून पोलिसांचे वेतन खाते ऍक्‍सिस बॅंकेत वळविल्याचा आरोप नागपुरातील सामाजिक कार्यकर्ते मोहनिश जबलपुरे यांनी केला आहे. यासंबंधीची तक्रारही त्यांनी ईडीकडे दाखल केली होती.