विरोधी पक्षनेते देवेंद्र फडणवीस यांच्या पत्नी अमृता फडणवीस नेहमीच काही ना काही कारणाने चर्चेत असतात. आज मुंबईत भाजपच्या कॅन्सरमुक्त अभियानाच्या कार्यक्रमात त्यांनी उपस्थिती लावली. यावेळी पत्रकारांशी बोलताना त्यांनी महाशिवरात्रीला नवा गाण्याचा अल्बम प्रसिद्ध करणार असल्याचं सांगितलं. तर, मुंबईच्या ट्रॅफिवरही टीका केली. (Amruta Fadnavis Songs)

अमृता फडणवीस स्वत: बँकर आहेत. त्या पार्श्वगायनही करतात. फडणवीस यांचे अनेक अल्बम याआधी प्रसिद्ध झाले आहेत. त्यांचे चाहते कायम गाण्याची वाट पाहात असतात. या चाहत्यांना आता आणखी एक पर्वणी मिळणार आहे. मुंबईत भाजपने कॅन्सर दिनानिमित्त कार्यक्रम घेतला होता. यावेळी अमृता फडणवीस यांनीही कार्यक्रमाला उपस्थिती लावली.

कार्यक्रमानंतर पत्रकारांशी बोलत असताना त्यांनी मुंबईतील समस्यांवर भाष्य केलं. मुंबईतील ट्रॅफिकमुळे ३ टक्के लोकांचे घटस्फोट होत असल्याची माहिती अमृता यांनी दिली. यासोबत त्यांनी नव्या अल्बमचीही घोषणा केली.

'तिला जगू द्या', 'गणपती साँग' आणि आता 'शिवतांडव'

येत्या महाशिवरात्रीपर्यंत नवा मुझिक अल्बम घेऊन येणार असल्याचं त्यांनी सांगितलं. 'शिवतांडव' नावाने त्या गाणं येणार असल्याची चर्चा आहे. याआधी अमृता फडणवीसांनी अनेक गाण्याचे अल्बम काढले आहेत. फडणवीस यांचं गणपतीवर गाणं आलं होतं. यानंतर 'तीला जगू द्या', हे तरुणींवरील अत्याचाराला वाचा फोडणारं गाणंही हीट झालं. तर, देवेंद्र फडणवीसांसोबत त्यांनी राज्यातील नद्यांवरही गाणं गायलं होतं.