पुणे : बाबासाहेब पुरंदरे यांनी इतिहास लेखनात छत्रपती शिवाजी महाराज (Chhatrapati Shivaji Maharaj) यांच्यावर मोठा अन्याय केला आहे. पुरंदरे यांनी त्यांच्या लेखनात महाराजांवर जेवढा अन्याय केला आहे, तेवढा अन्याय अन्य कोणत्याही लेखकाने केला नसल्याचा आरोप राष्ट्रवादी काँग्रेसचे अध्यक्ष शरद पवार यांनी पुण्यात एका कार्यक्रमात बोलताना केला आहे. त्यानंतर शरद पवारांनी शिवचरित्र लिहून महाराजांवरील अन्याय दूर करावा असा टोला ब्राह्मण महासंघाचे अध्यक्ष आनंद दवे यांनी लावला आहे.

(Anand Dave On NCP Sharad Pawar)

"बाबासाहेब पुरंदरे यांनी इतिहास लिहिताना महाराजांवर अन्याय केला हे पवार यांचे वक्तव्य केवळ चुकीचं नसून निंदनीय आहे. शरद पवार यांनी महाराष्ट्राची दिलगिरी व्यक्त केली पाहिजे कारण याआधी त्यांनी बाबासाहेब पुरंदरे यांचे समर्थन केल्याचे व्हिडिओ आमच्याकडे आहेत. शरद पवार हे इतिहासकार नाहीत असा टोला दवे यांनी लावला आहे.

राष्ट्रवादी अध्यक्ष शरद पवार यांनी इतिहासाचा अभ्यास नसताना फक्त जातीचे राजकारण करत पुन्हा एकदा बाबासाहेब पुरंदरे यांना सक्रिय करणे हे अत्यंत चुकीचे आहे. त्यांनी पुरंदरे यांच्याबद्दल केलेल्या वक्तव्याचा आम्ही निषेध करतो. पवार हे इतिहासकार नाहीत, ते जातीचं राजकारण करत आहेत हे चुकीचं आहे. जर पुरंदरेंनी लिहिलेल्या इतिहासाने शिवाजी महाराजांवर अन्याय झाला असं पवारांना वाटत असेल तर त्यांनी शिवचरित्र लिहून महाराजांवरील अन्याय दूर करावा असा टोला दवे यांनी पवारांवर लावला आहे.

काय म्हणाले होते पवार?

"दिवंगत शिवशाहीर बाबासाहेब पुरंदरे यांनी छत्रपती शिवाजी महाराजांचा खरा आणि वास्तववादी इतिहास लिहिला नाही. त्यांनी त्यांच्या लेखनात शिवाजी महाराजांवर कायम अन्याय केला आहे. दादोजी कोंडदेव महाराजांचे गुरु नव्हते तरी पुरंदरेंनी त्यांच्या इतिहासात याचा उल्लेख केला आहे. हा अन्याय दूर करण्यासाठी शिवाजी महाराजांचा खरा इतिहास समाजासमोर आणण्याची गरज आहे. यासाठी नवीन पिढीतील इतिहास तज्ज्ञांनी पुढाकार घेतला पाहिजे." असं शरद पवार म्हणाले होते.