मुंबई: अंधेरी पूर्व विधानसभा मतदारसंघासाठी पार पडलेल्या पोटनिवडणुकीत शिवसेना उद्धव बाळासाहेब ठाकरे गटाच्या उमेदवार ऋतुजा लटके यांचा विजय झाला आहे. दरम्यान या निकालानंतर (Andheri Bypoll Result) भाजपकडून ऋतुजा लटके (Rutuja Latke) यांचे अभिनंदन करण्यात आले आहे. तसेच ऋतुजा लटके यांचा विजय भाजपमुळे झाला असल्याचे भाजपचे नेते आशिष शेलार म्हणाले आहेत.

या निवडणुकीत उध्दव ठाकरे गटाच्या उमेदवार ऋतुजा लटके यांचा 53 हजार 471 मताधिक्याने विजय झाला. या निवडणुकीसाठी भाजपकडून मुरजी पटेल यांना सुरूवातीला उमेदवारी देण्यात आली होती, मात्र भाजपने या पोटनिवडणुकीत ऐनवेळी उमेदवारी अर्ज मागे घेतला.

मुंबई भाजपचे अध्यक्ष आशिष शेलार यांनी ट्विट केलं आहे की, "भाजपाच्या मदतीमुळे मा. ऋतुजा लटके यांचा अंधेरी पूर्व मध्ये विजय..ऋतुजाताईंचे अभिनंदन!! काँग्रेस, राष्ट्रवादी, भाकप यासह डझनभर पक्षांनी पाठींबा देऊन ही शिवसेना उध्दव बाळासाहेब ठाकरे गटाला ना मतदान जास्त झाले, ना मतं जास्त मिळाली भाजपाने निवडणूक लढवली असती तर यांचा पराभव निश्चित होता!"

अंधेरी पूर्व पोटनिवडणुकीत रिंगणात एकूण सात उमेदवार होते. यापैकी ठाकरे गटाच्या ऋतुजा लटके यांना 66 हजार 247 मते मिळाली तर, नोटा या पर्यायाला 12 हजार 776 मते मिळाली. तर अपक्ष उमेदवार बाळा नाडर यांना 1506 मते मिळाली.