एनसीबीचे (NCB) झोनल डायरेक्टर समीर वानखेडे (Sameer Wankhede) यांच्यावर झालेल्या गंभीर आरोपांनंतर समीर वानखेडे यांच्याकडे असलेल्या ६ प्रकरणांचा तपास समीर वानखेडे यांच्याकडून काढून घेण्यात आला होता. आपणच ही मागणी केली असून, या प्रकरणाचा तपास एनसीबीच्या दिल्लीच्या पथकाकडे सोपवण्यात आल्याचं समीर वानखेडेंकडून सांगण्यात आलं होतं. एनसीबीच्या विशेष तपास पथकाने (SIT) आता सर्व ६ प्रकरणातील आरोपींना समन्स बजावले आहे. यामध्ये आर्यन खान (Aryan Khan), नवाब मलिक यांचे जावई समीर खान (Sameer Khan) यांच्यासह इतर आरोपींचा देखील समावेश आहे.

राज्याचे अल्पसंख्यांक मंत्री नवाब मलिक यांनी एनसीबीने केलेल्या कारवाईवर अनेक गंभीर प्रश्न उपस्थित केले होते. समीर वानखेडे यांनी खंडणीसाठी ही सर्व कारवाई ठरवून केल्याचा आरोप देखील मलिक यांनी केला. एकुणच या सर्व प्रकरणात नवाब मलिक यांनी समीर वानखेडेंवर सुरू केलेल्या आरोपांच्या मालिकेनंतर काही दिवसांपूर्वीच या प्रकरणाने एक मोठं वळण घेतलं. एनसीबीचे झोनल डायरेक्टर समीर वानखेडे यांच्याकडे असलेल्या आर्यन खानसह इतर ६ प्रकरणांचा तपास एनसीबीच्या एका दुसऱ्या पथकाकडे देण्यात आला आहे. त्यानुसार आता या पथकाने आर्यन खानला चौकशीसाठी बोलावलं आहे.

नवाब मलिक यांनी आज पत्रकार परिषद घेत नवाब समीर वानखेडे यांच्यावर गंभीर आरोप केले. आर्यन खान हा स्वत: तिकिट विकत घेऊन त्या पार्टीमध्ये गेला नव्हता, तर त्याला प्रतिक गाबा आणि अमीर फर्निचरवाला हे त्या पार्टीत घेऊन गेले होते. त्यानंतर आता एनसीबीने नवाब मलिक यांच्याकडे जर पुरावे असेल तर त्यांनी ते कोर्टात सादर करावे असं आवाहन केलं आहे. तसेच एनसीबीकडून असंही सांगण्यात आलंय की, वानखेडे आणि सॅम डिसोझा यांच्यात संपर्क नव्हता असं इंडिया टुडेच्या वृत्तामधून समोर आलं आहे.