Ashish Shelar Latest News मुंबई : महाराष्ट्र मंत्रिमंडळाचा विस्तार मंगळवारी (ता. ८) होणार आहे. यावेळी भाजपकडून दहा ते बारा मंत्री शपथ घेणार असल्याची माहिती. तसेच शिंदे गटाकडून सहा ते सात मंत्री शपथ घेऊ शकतात. भाजपकडून प्रदेशाध्यक्ष चंद्रकांत पाटील यांना मंत्रिमंडळात संधी देण्यात येणार आहे. यामुळे पुढील प्रदेशाध्यक्ष कोण होणार, असा प्रश्न उपस्थित करण्यात येत आहे. प्रदेशाध्यक्षपदासाठी आशिष शेलार (Ashish Shelar) यांचे नाव आघाडीवर असल्याची माहिती सूत्रांकडून प्राप्त झाली आहे.

अनेक नाट्यमय घडामोडीनंतर मंगळवारी मंत्रिमंडळाचा विस्तार होणार आहे. पहिल्या टप्प्यात ज्या मंत्र्यांना मंत्रिमंडळात स्थान देण्यात येणार आहेत, त्यांना पक्षाकडून फोन करण्यात आल्याची माहिती आहे. या मंत्र्यांमध्ये भाजपचे (BJP) प्रदेशाध्यक्ष चंद्रकांत पाटील (Chandrakant Patil) यांच्या नावाचाही समावेश आहे. पाटलांना मंत्री केल्यास पुढचा प्रदेशाध्यक्ष भाजपला निवडावा लागणार आहे.

३० जून रोजी शिंदे-फडणवीस यांचे सरकार स्थापन झाले. आज या घटनेला दीड महिना होत आहे. मात्र, महाराष्‍ट्रात मुख्यमंत्री एकनाथ शिंदे आणि उपमुख्यमंत्री देवेंद्र फडणवीस असे दोनच मंत्री आहे. यामुळे विस्तार कधी होणार, असा प्रश्न सातत्याने विचारला जात होता. आता दिवस, वेळ ही ठरला आहे. तसेच काही मंत्र्यांची निवडही करण्यात आली आहे. यामुळे उद्या विस्तार होईलच, हे पक्के झाले आहे.

चंद्रकांत पाटील मंत्री झाल्यास आशिष शेलार यांच्याकडे प्रदेशाध्यक्षपदाची जबाबदारी सोपवली जाण्याची शक्यता सूत्रांकडून वर्तवली जात आहे. महापालिका निवडणुका, लोकसभा आणि विधानसभेच्या निवडणुका लक्षात घेऊन शेलारांकडे (Ashish Shelar) प्रदेशाध्यक्षपदाची जबाबदारी सोपवली जाण्याची शक्यता आहे. त्यांना मंत्री करण्यात येणार नसल्याने मोठी जबाबदारी देण्यात येणार असल्याची माहिती आहे.