नवी मुंबई : आज राज्य मंत्रीमंडळाची आणि मराठा समन्वयकाशी बैठक पार पडली असून कॉंग्रेसचे अशोक चव्हाण यांनी आपली प्रतिक्रिया माध्यमांना दिली आहे. मंत्रीमंडळाच्या बैठकीत काही नव्या विभागाच्या निर्मिती झाल्या आहेत. त्यांच्या अंमलबजावणीसंदर्भात चर्चा झाली असल्याचं त्यांनी सांगितलं आहे.

काल मराठा समाजाच्या समन्वयकांच्या वतीने मंत्रालयाच्या पायऱ्यावर बसून ठिय्या आंदोलन करण्यात आलं होतं. मुख्यमंत्र्यांशी चर्चा केल्याशिवाय उठणार नाही अशी त्यांची मागणी होती त्यानंतर आज त्यांच्याशी चर्चा करण्यात आली आहे.

दरम्यान शासकीय गोष्टींच्या अंमलबजावणीसाठी काही अवधी लागतो त्यासाठी वेळ द्यावा लागतो असं ते म्हणाले. परंतु विभागनिहाय बैठका झाल्या तर काही प्रश्न सोपे होतील. संबंधित विभागाचे मंत्री आणि अधिकाऱ्यांनी आणि सचिव एकत्र येऊन बैठका पार पडायला पाहिजेत असं मी माझं मत बैठकीत व्यक्त केलं असल्याचं ते म्हणाले. तसेच काही अन्य काम असल्यामुळे आपण बैठकीतून लवकर बाहेर आलो आहोत असंही ते म्हणाले आहेत.

राज्याचे मंत्रीमंडळ आणि मराठा समन्वयकाची बैठक आज पार पडत असून मराठा समाजाच्या प्रलंबित प्रश्नावर चर्चा केली जात आहे. त्यासंबंधित बैठकीत अशोक चव्हाण हे माध्यमांना बोलत होते. सामाजिक सलोखा राखला जाईल अशी अंमलबजावणी केली पाहिजे. बऱ्याचश्या गोष्टींना प्रशासकीय प्रक्रिया असते पण काही वेळा त्याची अंमलबजावणी वेळेत होताना दिसत नाही, त्यासाठी पाठपुरावा करणं महत्त्वाचं आहे असं मत त्यांनी यावेळी व्यक्त केलं.

सध्या ओबीसी आणि मराठा समाजाच्या प्रश्नावरुन चर्चा सुरु आहेत. तसेच ओबीसी आरक्षणाच्या मुद्द्यावरुन निवडणुका पुढे ढकलल्या आहेत. त्यातच आज मराठा समाजाच्या आरक्षणासंदर्भात बैठक पार पडली आहे.