गेल्या आठ दिवसांपासून आसाममधल्या गुवाहाटीमध्ये शिवसेनेच्या बंडखोर आमदारांसह राज्याचे नगरविकास मंत्री आणि शिवसेना नेते एकनाथ शिंदे वास्तव्यास आहेत. आसाममध्ये पूर परिस्थिती निर्माण झाली आहे. अशातच आता पूरग्रस्तांसाठी या आमदारांनी मदत जाहीर केली आहे. शिंदेंनी ट्वीट करत याबद्दलची माहिती दिली आहे. (Eknath Shinde Assam News)

आसाममधील पूरग्रस्त बांधवांच्या मदतीसाठी शिवसेनेचे सर्व आमदार तसेच सहयोगी आमदारांच्या वतीने आसाम (Assam flood) मुख्यमंत्री मदत निधीत 51 लाख रुपयांची मदत करण्याचा निर्णय घेण्यात आल्याची घोषणा शिंदे यांनी आपल्या ट्विटर अकाऊंटवरुन केली आहे. गेल्या आठ दिवसांपासून एकनाथ शिंदेंसह (Eknath Shinde) बंडखोर आमदार आसाममध्ये आहेत. दरम्यान, आजच ते आसाममधून निघणार आहेत.

आज हे सर्व बंडखोर आमदार आसाममधून गोव्याकडे निघणार आहेत. गोव्यामध्ये हॉटेल ताज ट्रायडेंटच्या काही खोल्या बुक करण्यात आल्या आहेत. त्यानंतर उद्या होणाऱ्या बहुमत चाचणीसाठी हे सर्व आमदार सकाळी मुंबईकडे निघणार आहेत. त्याआधीच बंडखोरांकडून ही मदत जाहीर करण्यात आली आहे.