शिवसेना-राष्ट्रवादी आमदार आपात्रता प्रकरणाची सुनावणी सध्या सर्वोच्च न्यायालयात सुरू आहे. दरम्यान मागील सुनावणीवेळी आमदार आपत्रता प्रकरणात विधानसभा अध्यक्ष राहुल नार्वेकर यांनी तयार केलेल्या वेळापत्रकाबाबत सर्वोच्च न्यायालयाने मंगळवारी (आज) सुधारीत वेळापत्रक सादर करावे असे निर्देश दिले होते.

त्यानंतर अध्यक्षांना आज पुन्हा सुनावणीसंबधीची सविस्तर माहिती न्यायालयाला द्यावी लागणार आहे. आज विधानसभा अध्यक्ष काय भूमिका मांडणार याकडे राज्यासह देशाचं लक्ष लागलं आहे. मागील आठवड्यात सुनावणीवेळी सर्वोच्च न्यायालयाने महाराष्ट्राच्या विधानसभा अध्यक्षांच्या कार्यपद्धतीवर नाराजी व्यक्त केली होती.

आमदार अपात्रता प्रकरणी सर्वोच्च न्यायालयात 13 ऑक्टोबर रोजी सुनावणी पार पडली. आमदार अपात्रता दिरंगाई प्रकरणी ठाकरे गट आणि राष्ट्रवादी (शरद पवार गट) यांच्या याचिकांवर एकत्रितपणे सुनावणी पार पडली. या सुनावणीत सर्वोच्च न्यायालयाने विधानसभा अध्यक्षांवर तीव्र शब्दांत ताशेरे ओढले होते. तसेच, अध्यक्षांना कायदा समजत नसेल, तर त्यांच्या बाजूला बसून त्यांना कायदा शिकवा, असं सांगत सरन्यायाधीश चंद्रचूड यांनी विधानसभा अध्यक्षांची बाजू मांडणारे सॉलिसिटर जनरल तुषार मेहता यांना सांगितलं होतं.

सर्वोच्च न्यायालयाने दिलेल्या निर्देशांनंतर आज विधानसभा अध्यक्ष सुधारित वेळापत्रक सादर करणार आहेत. आज मंगळवारी (17 ऑक्टोबर) विधानसभा अध्यक्षांनी नवं वेळापत्रक सादर करावं. जर निश्चित वेळापत्रक अध्यक्षांकडून येऊ शकलं नाहीतर मात्र सर्वोच्च न्यायालयाला विशिष्ट टाईमलाईन आखून द्यावी लागेल, असं सर्वोच्च न्यायालयाने म्हटलं होतं.

आज विधानसभा अध्यक्षांच्या सुधारित वेळापत्रकाकडे सर्वांचं लक्ष लागलं असून अध्यक्षांनी सादर केलेलं वेळापत्रक सर्वोच्च न्यायालय मान्य करणार का? याकडे सर्वांचं लक्ष लागलं आहे.