मुंबई : औरंगाबाद एमआयडीसीमधील (aurangabad MIDC) महापालिकेच्या कोविड केअर हॉस्पीटलमध्ये (municipal corona hospital) शिवसेना उपनेते सचिन अहिर (sachin ahir) यांच्या प्रयत्नांनी उभारलेल्या ऑक्सिजन निर्मिती प्लांटचे (oxygen plant) नुकतेच लोकार्पण करण्यात आले. कोरोनाविरुद्धच्या लढ्याचा एक भाग म्हणून दीपक फर्टिलायझर्स (deepak fertilizers) कंपनीच्या सहकार्याने हा प्रकल्प उभारण्यात आला आहे.

या प्रकल्पाची क्षमता मिनिटाला 250 लीटर तर दिवसाला अर्धा मेट्रिक टन ऑक्सिजन निर्मितीची आहे. औरंगाबादचे पालकमंत्री सुभाष देसाई यांच्या हस्ते दृकश्राव्य माध्यमातून या प्रकल्पाचे उद्घाटन झाले. कोरोनाचा विळखा आता सैलावला असला तरी कोरोनाची तिसरी लाट येणार या चर्चेने सर्वत्र भीतीचे वातावरण आहे. सर्वांनीच सावधगिरी घेतली तर पुढची लाट येणारही नाही. पण आपली तयारी असावी म्हणून आणि कोरोना लाट आलीच तर ऑक्सिजनची कमतरता भासू नयेत आणि रुग्णांचे प्राण वाचावेत, या हेतूने हा प्रकल्प सुरू करण्यात आला आहे, असे देसाई यांनी सांगितले.

या प्रकल्पाच्या माध्यमातून महापालिकेचे कोविड हॉस्पिटल ऑक्सिजन निर्मितीत स्वतः पुढाकार घेत आहे ही स्वागतार्ह बाब असल्याचेही देसाई म्हणाले. या प्रकल्पाला दीपक फर्टिलायझर्स कंपनीचे आर्थिक पाठबळ लाभले आहे. सचिन अहिर दीपक फर्टिलामझर एम्प्लॉइज युनियनचे अध्यक्ष असून त्यांच्या प्रयत्नांमुळे हा प्रकल्प उभा राहिला. याप्रसंगी खासदार चंद्रकांत खैरे, आमदार अंबादास दानवे, संजय शिरसाट, प्रदीप जैस्वाल, तसेच आयुक्त आस्तिक पांडेय उपस्थित होते.