मुंबई - शिवसेना शिंदे गटाचे नेते भरत गोगावले यांनी दोन दिवसांपूर्वी केलेल्या विधानामुळे राजकणात खळबळ उडाली होती. त्यावर सर्वच नेत्यांनी प्रतिक्रिया दिल्या होत्या. मात्र आता भरत गोगावले यांनी आपल्या गौप्यस्फोटावर सारवासारव केली आहे. तसेच सारवासारव करताना पुन्हा गंमतीदार विधान केलं आहे.

भरत गोगावले एका कार्यक्रमात म्हणाले होते की, मंत्रीपदासाठी माझाच नंबर पहिला होता. मात्र तीन आमदारांनी फार हट्ट केला. एक म्हणाला होता की, मला मंत्रिपद मिळालं नाही, माझी बायको आत्महत्या करेल, दुसरा म्हणाला होता मला जीव द्यावा लागेल, तर तिसरा म्हणाला होता, मला नारायणे संपून टाकतील. त्यामुळे मी मागे थांबलो होतो.

गोगावले यांच्या विधानावर शिंदे गटाच्या नेत्यांनी प्रतिक्रिया देणं टाळलं होतं. तर विरोधकांनी यावरून सरकारवर निशाणा साधाला होता.मात्र आता भरत गोगावले यांनी सारवासारव केली आहे. गोगावले म्हणाले की, मी अजिबात नाराज नाहीये. माझ्या वक्तव्याचा विपर्यास करण्यात आला आहे. मुख्यमंत्र्यांनी आम्हाला समज दिली आहे. आम्ही तर उरलेल्या भाकरीत देखील वाटा द्यायला तयार आहोत.

याआधी देखील भरत गोगावले यांनी एक भाकर मिळायची तर अर्धी भाकर मिळेल. आर्धी मिळायची चतकोर मिळेल, असं म्हटलं होतं. त्यावरून देखील विरोधकांनी त्यांना लक्ष केलं होतं. आता त्यांनी उरलेल्या भाकरीतही आणखी कोणाला वाटा देण्यास तयार असल्याचं म्हटलं आहे. त्यामुळे राज्याचा कारभार नेत्यांना मिळणाऱ्या भाकरीवर येऊ ठेपला की काय, असा प्रश्न उपस्थित होतोय.