हिंगोली : भारत जोडो यात्रेचा राज्यातील आज पाचवा दिवस असून ही यात्रा सध्या हिंगोलीतून जात आहे. विशेष म्हणजे आजच्या दिवशी शिवसेना नेते आदित्य ठाकरे यांनी या यात्रेत हजेरी लावली. आदित्य ठाकरे यावेळी राहुल गांधींसोबत चालत आहेत. यावेळी त्यांच्यासोबत काँग्रेसचे प्रदेशाध्यक्ष नाना पटोले देखील आहेत. (Bharat Jodo Yatra Aditya Thackeray with Rahul Gandhi attended Bharat Jodo Yatra at Hingoli)

काँग्रेस हायकमांड असलेल्या राहुल गांधींसोबत पदयात्रेत शिवसेनेचे नेते सहभागी होतील असं यापूर्वी कधीही वाटलं नसेल पण हे प्रत्यक्षात घडलं आहे. राज्यात महाविकास आघाडी सध्या अस्तित्वात आहे. यामध्ये काँग्रेससह शिवसेना आणि राष्ट्रवादी काँग्रेस या पक्षांचा समावेश आहे. त्यामुळं सहाजिकचं राज्यातील राजकारणंही बदललं आहे. पण आता संपूर्ण भारत पादाक्रांत करण्यासाठी निघालेले राहुल गांधी यांना विविध राज्यांमधील विविध पक्षांचे नेते जॉईन होत आहेत.

राहुल गांधी या यात्रेमध्ये अनेक सामान्य लोकांना भेटत आहेत. थेट जनतेत जात असल्यानं त्यांना भेटण्यासाठी नागरिक मोठ्या प्रमाणावर या यात्रेत सहभागी झालेले पहायला मिळत आहेत. राजकारण्यांसोबतच मनोरंजन, क्रीडा अशा विविध क्षेत्रातील मान्यवर मंडळी देखील राहुल गांधींच्या 'भारत जोडो यात्रेत' सामिल होत आहेत.

या यात्रेत राज्यातील महाविकास आघाडीतील नेतेही सहभागी होत आहेत. शिवसेनाप्रमुख उद्धव ठाकरे देखील या यात्रेत सहभागी होणार असल्याची चर्चा होती. पण त्यांच्याऐवजी आदित्य ठाकरे मात्र यात सहभागी होणार असल्याचं जाहीर करण्यात आलं होतं. खुद्द काँग्रेस नेते अशोक चव्हाण यांनी याबाबत माहिती दिली होती. सुरुवातीला आदित्य ठाकरे ९ नोव्हेंबरला यात्रेत सहभागी होतील असं सांगितलं जात होतं पण आज ते यात्रेत सहभागी झाले आहेत. कालच राष्ट्रवादीच्या खासदार सुप्रिया सुळे सहभागी झाल्या होत्या.