Rashmi Shukla Phone Tapping - महाराष्ट्राच्या राजकारणात धुमाकूळ घालणारे फोन टॅपिंग प्रकरण आता पूर्णपणे बंद झालं आहे. सीबीआयने दाखल केलेला क्लोजर रिपोर्ट न्यायालयाने स्वीकारला आहे.

त्यामुळे आयपीएस अधिकारी रश्मी शुक्ला यांना मोठा दिलासा मिळाला आहे. २०१९ साली महाविकास आघाडीच्या वाटाघाटी सुरू असताना महाराष्ट्र गुप्तचर विभागाच्या तत्कालीन प्रमुख रश्मी शुक्ला यांनी महाविकास आघाडीच्या नेत्यांचे फोन टॅप केल्याचा आरोप करण्यात आला होता.

या प्रकरणी देवेंद्र फडणवीस यांचा जबाब देखील नोंदवण्यात आला होता. सीबीआयने आपल्या तपासात जे आरोप केलेत ते निष्पन्न होत नसल्याचं सांगितलं. त्यानंतर सीबीआयने क्लोजर रिपोर्ट दाखल केला. त्याला न्यायालयाने मान्यता दिली आहे. आता हे प्रकरण पूर्णत: बंद होईल.

विरोधीपक्षनेते असताना देवेंद्र फडणवीसांनी मार्च २०२१ मध्ये फोन टॅपिंग संदर्भात गंभीर आरोप केले होते. त्या संदर्भातील सिक्रेट डॉक्युमेंट तत्कालीन आयुक्त रश्मी शुक्ला यांनी तत्कालीन डीजी सुबोध जयसवाल यांना दिले होते. ते डॉक्युमेंट विरोधी पक्षनेत्यांकडे कसे गेले, याबाबत तक्रार करण्यात आली होती. त्यानुसार फडणवीसांचा जबाब नोंदवला होता.

दरम्यान ठाकरे सरकार कोसळल्यानंतर हे प्रकरण सीबीआयकडे गेलं होतं. आता सीबीआयने क्लोजर रिपोर्ट दिल्यामुळे या प्रकरणाचा तपास थांबला आहे. यामुळे देवेंद्र फडणवीस आणि रश्मी शुक्ला या दोघांना मोठा दिलासा मिळाला आहे.