नवी दिल्ली - पंतप्रधान नरेंद्र मोदी यांच्या नेतृत्वात भाजपने देशातील अनेक राज्यांमध्ये सत्ता मिळावली. दक्षिणेकडील काही राज्य सोडले तर भाजपने देशात एकहाती वर्चस्व मिळवलं आहे. लोकसभेत भाजपला स्पष्ट बहुमत आहे. आता भाजपने एक पाऊल पुढे जात, अभेद्य असलेल्या बारामती मतदार संघाकडे मोर्चा वळवला आहे. याशिवाय महाराष्ट्रात लोकसभेसाठी मिशन ४५ राबविण्याची भाजपने तयारी सुरू झाली आहे. (BJP Mission 45 for loksabha election 2024)

राष्ट्रवादी काँग्रेसचे प्रमुख शरद पवार यांचं प्राबल्य असलेल्या बारामतीवर भाजपचं विशेष लक्ष असणार आहे. महाराष्ट्रात सत्तांतर घडून आल्यानंतर भाजपने आपलं मिशन सुरू केलं आहे. या मिशन अंतर्गत १६ ते १८ ऑगस्ट दरम्यान केंद्रीय अर्थमंत्री निर्मला सीतारामन बारामती दौऱ्यावर आहेत. बारामती मतदार संघातून आतापर्यंत शरद पवार, अजित पवार निवडून आलेले असून आता सुप्रिया सुळे येथून खासदार आहेत.

बारामती जिंकण्यासाठी भाजपने कंबर कसली आहे. या पार्श्वभूमीवर सीतारामन तीन दिवस बारामतीमध्ये मुक्कामी असणार आहे. या मिशनसाठी आमदार चंद्रशेखर बावनकुळे यांनी नियोजन केलं आहे. तर केंद्रीय राज्यमंत्री अजयकुमार मिश्रा ११ ते १३ ऑगस्ट दरम्यान रत्नागिरी आणि सिंधुदूर्ग जिल्ह्याचा दौरा करणार आहे.

दरम्यान मिशन ४५ अंतर्गत भाजपने महाराष्ट्रातील १६ जागा निवडल्या आहेत. यापैकी १० जागांवर शिवसेनेचे प्राबल्य आहे. यामध्ये बुलडाणा, चंद्रपूर, हिंगोली, औरंगाबाद, पालघर, कल्याण, दक्षिण मध्य मुंबई, दक्षिण मुंबई, रायगड, बारामती, शिरुर, शिर्डी, सातार, रत्नागिरी-सिंधुदूर्ग, कोल्हापूर आणि हातकंगले या मतदार संघांचा समावेश आहे.