ग्रामपंचायत निवडणुकीसाठी गावामध्ये मोठ्या प्रमाणात चुरस पाहायला मिळते, यादरम्यान भाजपचे आमदार नितेश राणे हे बिनविरोध सरपंच पदासाठी पैशांची ऑफर देत असतानाचा व्हिडिओ सध्या व्हायरल झाला आहे. नेहमीच त्यांच्या विधानांमुळे राजकीय वर्तुळात चर्चेत असणारे नितेश राणे कोकणातील एका गावात भाषण करताना गावकऱ्यांना ग्रामपंचायत निवडणुक बिनविरोध करण्यासाठी पैशांचे अमिष देताना दिसत आहेत.

या भाषणाचा व्हिडिओ सध्या मोठ्या प्रमाणात व्हायरल होत आहे. या व्हिडिओमध्ये राणे बोलताना दिसत आहेत. भाजपकडून बिनविरोध सरपंच निवडून आणणाऱ्या गावाला ५० लाख निधी माझ्याकडून देईल अशी ऑफर देताना नितेश राणे दिसत आहेत. ग्रामपंचायत निवडणुकीच्या पार्श्वभूमीवर नितेश राणेंनी गावकऱ्यांना ही मोठी ऑफर दिली.

हेही वाचा - गरज आहे पंढरपूर पुन्हा समतेचे पीठ होण्याची....

नितेश राणे म्हणाले की, माझी एकच अट आहे, भारतीय जनता पक्षाचा सरपंच आणि सदस्य त्या ठिकाणी बसले पाहिजेत. त्यासाठी जी ताकद द्यायचीय ती तुम्ही निवडा, पुढे मी हेही सांगतो की, भाजपचा सरपंच बिनविरोध तुम्ही निवडूण देईल, त्या गावाला मी माझ्याकडून ५० लाखांचा निधी मी माझ्याकडून जाहीर करतो असे ते म्हणाले आहेत. नितेश राणेंचा हा व्हिडिओ सध्या जोरात व्हायरल होत आहे.