आगामी लोकसभा निवडणूकीपूर्वी भाजपने जोरदार मोर्चेबांधणीला सुरूवात केला आहे. यासोबत डिजिटल प्लॅटफॉर्म्सवरती देखील लोकांपर्यंत पोहचण्यासाठी भाजपकडून जोरदार प्रयत्न केले जात आहेत. केंद्र आणि राज्य सरकारच्या विकास योजना जनतेपर्यंत पोहोचवण्यासाठी खास प्लॅन तयार केला आहे. या प्लॅननुसार महाराष्ट्रात एक कोटी अँबेसेडर तयार करण्यात येणार आहेत.

हे अँबेसेडर लोकसभा निवडणुकीत केंद्र सरकारची कामे जनतेपर्यंत घेऊन जाण्याचं काम करणार असल्याचे सांगितले जात आहे. यांच्या माध्यमातून भाजप राज्यातील घराघरात विकासकामांची माहिती घेऊन जाणार आहे.

भाजपच्या नमो ॲप अभियानाचे राष्ट्रीय संयोजक कुलजीत सिंग चहल यांनी सांगितलं की, राज्यभरात प्रदेश भाजपतर्फे कोटी पेक्षा अधिक विकसित भारत अँबेसेडर बनविण्याचे लक्ष्य ठेवण्यात आले आहे. भाजप प्रदेश पदाधिकाऱ्यांच्या बैठकीनंतर ही माहिती देण्यात आली.

भाजपच्या प्रत्येक कार्यकर्ता कमीत कमी असे १० अँबेसेडर तयार करेल असे चहल यांनी सांगितले. तसेच भाजपकडून मोदी सरकारच्या विविध योजनाचा लाभ घेतलेल्या सर्वांना या मोहिमेत सहभागी होण्याचे अवाहन देखील त्यांनी केलं.

चहल यांनी सांगितलं की, पंतप्रधान नरेंद्र मोदी यांच्या संकल्पनेतील विकसित भारत संकल्पासोबत हे विकसित भारत ब्रँड अँबेसेडर जोडले जातील आणि मोदी सरकारच्या महत्वाकांक्षी कल्याणकारी योजनांचा लाभ समाजाच्या सर्व घटकांपर्यंत पोहोचविण्याचे काम हे अँबेसेडर करतील.