मुंबई : शिवसेना नेता संतोष परब (Santosh Parab Attack Case) यांच्यावर जीवघेणा हल्ला करण्याचं प्रकरण भाजप नेते नितेश राणे (BJP Leader Nitesh Rane) यांना चांगलंच भोवणार असल्याचं दिसतंय. याच प्रकरणी नितेश राणे यांना अटक होणार असल्याची शक्यता आहे. त्यावरूनच आता भाजपचे प्रदेशाध्यक्ष चंद्रकांत पाटील (BJP Chandrakant Patil) यांनी प्रतिक्रिया दिली असून त्यांनी नितेश राणेंना पाठिंबा दर्शवला आहे.

राज्य सरकारने नारायण राणेंना अटक केली. त्याचं शेवटी काय झालं? त्यावेळी न्यायालयानं सरकारला झापलं. नारायण राणेंना दोन दिवसांत जामीन द्यावा लागला होता. सरकारला जे करायचं ते करू देत. नितेश राणे यांना अटक झाली तरी भाजप त्यांच्या पाठिमागे उभे राहील. लोकशाही अजूनही संपलेली नाही. त्यांना अटक केलीच तर न्यायालयात जाऊन दाद मागणार. नितेश राणेंसाठी भाजप समर्थ आहे, असं चंद्रकांत पाटील म्हणाले.

नेमकं प्रकरण काय?

सिंधुदूर्ग जिल्ह्यातील शिवसैनिक संतोष परब यांच्यावर जीवघेणा हल्ला करण्यता आला होता. याप्रकरणी हल्लेखोर सचिन सातपुतेला सिंधुदुर्ग पोलिसांनी दिल्लीहून अटक केली. याचप्रकरणी नितेश राणे यांची देखील कणकवली पोलिसांनी दोन वेळा चौकशी केली. पण, त्यांना तिसऱ्यांदा चौकशीसाठी बोलावले असता ते गैरहजर होते. त्यानंतर सिंधुदुर्ग पोलिसांनी राणेंना शोधण्यासाठी मोहीम सुरू केल्याचं दिसतंय. त्यांनी नीतेश राणेंच्या घरीदेखील भेट दिली. पण, ते तिथंही उपस्थित नाही. त्यानंतर पोलिसांनी सिंधुदुर्ग, गोवा आणि मुंबईत नितेश राणेंना ताब्यात घेण्यासाठी फिल्डींग लावल्याची सूत्रांची माहिती आहे. पोलिस राणेंचा इतका शोध घेत असताना आता त्यांना अटक होणार का? याकडं सर्वांचं लक्ष लागलं आहे.

दरम्यान, अधिवेशन काळात आमदाराला अटक करता येत नाही. तसेच महत्वाच्या प्रकरणात अटक करायची असल्यास विधानसभा अध्यक्षांची परवानगी घ्यावी लागते. मात्र, अजूनही विधानसभा अध्यक्षांची निवड झालेली नाही. त्यामुळे हंगामी अध्यक्षांच्या परवानगीने अटक होणार का? असाही प्रश्न उपस्थित केला जात आहे.