नवी दिल्ली : भारतीय कुस्ती महासंघाचे (WFI) अध्यक्ष बृजभूषण शरण सिंह यांच्यावर ऑलिम्पिकपटू महिला कुस्तीपटूंनी लैंगिक शोषणाचे आरोप केले आहेत. यापार्श्वभूमीवर दिल्लीत बृजभूषण सिंह यांच्याविरोधात आंदोलन सुरू आहे. आता या वादात महाराष्ट्र नवनिर्माण सेनेने उडी घेतली आहे. (WFI president Brij Bhushan Sharan Singh news in Marathi)

बृजभूषण शरण सिंह यांनी राज ठाकरे यांच्या आयोध्या दौऱ्याला विरोध केला होता. तेव्हापासून मनसे आणि बृजभूषण यांच्यात संघर्ष सुरू होता. मात्र राज ठाकरे यांनी मनसेनिकांना शांततेचं आवाहन केलं होतं. शिवाय बृजभूषण यांच्या पुणे दौऱ्याला विरोध न करण्याच्या सूचना मनसैनिकांना करण्यात आल्या होत्या. मात्र आता बृजभूषण यांच्यावर लैंगिक शोषणाचे आरोप होताच मनसे आक्रमक झाली आहे.

मनसेनेते प्रकाश महाजन म्हणाले की, बृजभूषण हा गुंड प्रवृत्तीचा आहे. ज्या महिला कुस्तीपट्टूंनी आरोप केले, त्यांच्या साक्षी मलिक आहे. साक्षीने निवडणूक लढवली असेल. त्या भाजपशी निगडीत आहे. राज ठाकरे यांच्या आयोध्या दौऱ्यावेळी आम्हाला सोडा, बृजभूषण यांनी केंद्र सरकार आणि उत्तर प्रदेश सरकारला वेठीस धरलं होतं. राष्ट्रवादीचे प्रमुख शरद पवार, सुप्रिया सुळे यांचं यावर काय म्हणणं आहे, असा प्रश्न महाजन यांनी उपस्थित केला.

दरम्यान षडयंत्र रचून राज ठाकरे यांना आयोध्येला जाण्यापासून रोखलं होतं. असे लोक भाजपमधील असतील, तर २०२४ मध्ये कसं होईल. भाजपचं यावर काय म्हणण आहे,असा सवाल प्रकाश महाजन यांनी केला. भाजप यावर मुग गिळून बसलं आहे. भाजप त्यांच्यावर कारवाई करेल, याची शक्यता कमी आहे. तो तिकडचा शिक्षणसम्राट आहे. बाहुबली नेता आहे. यावर आता भाजपच्या महिला आघाडीनेच उत्तर द्यावं, असं आवाहनही प्रकाश महाजन यांनी केलं.

या माणसाची प्रवृत्तीच चूक आहे. त्याची हकालपट्टी व्हायला हवी. आपल्या देशाच्या राष्ट्रपतीपदी महिला आहे. जंतरमंतर या सार्वजनिक ठिकाणी आरोप झाले आहेत. त्यामुळे अशा माणसाला धडा शिकवायला हवा, अशी मागणी महाजन यांनी केली.