सोलापूर : कुर्डुवाडीहून गाणगापूरला जाऊन तेथून पुन्हा कुर्डुवाडीकडे निघालेली बस (एमएच २०, बीएल ४२१५) कुंभारी टोल नाक्याजवळील पेटली. चालकाने प्रसंगावधान साधून गाडी थांबवली व बसमधील ४८ प्रवाशांना सुखरूप खाली उतरविले. त्यानंतर काही मिनिटांनी बसने पेट घेतला आणि अर्ध्या तासात बस प्रवाशांसमोरच आगीत भस्मसात झाली.

कुर्डुवाडी येथून सोमवारी (ता. १४) सकाळी नऊ वाजता गाणगापूरच्या दिशेने बस रवाना झाली होती. त्यानंतर ती बस दुपारी सव्वातीनच्या सुमारास प्रवाशांना घेऊन कुर्डुवाडीच्या दिशेने निघाली. वळसंग टोल नाका ओलांडून काही अंतरावरील कुंभारी पुलावर आल्यावर बोनेटमधून धूर येऊ लागला. चालक प्रशांत पांचाळ यांच्या लक्षात ही बाब आली आणि त्यांनी गाडी रस्त्याच्या बाजूला घेतली. गाडीच्या बोनेटमधून धूर येत असल्याने वाहक सुभाष महिंद्रकर यांनी प्रसंगावधान साधून गाडीतील ४८ प्रवासी (४४ प्रौढ व चार लहान मुले) काही मिनिटातच खाली उतरवून दूर अंतरावर नेले. १० मिनिटात गाडीने पेट घेतला आणि पाहता पाहता बस अर्ध्या तासात जळून खाक झाली.

गाडीचा तीन महिन्यांपासून कोणताही प्रॉब्लेम नव्हता, आठ वर्षांपूर्वीची जुनी बस असताना देखील टकाटक होती, असे आगारप्रमुखांनी सांगितले. घटनेची माहिती मिळताच वळसंग पोलिस ठाण्याचे प्रभारी सहायक पोलिस निरीक्षक अनिल सनगल्ले यांनी घटनास्थळी धाव घेतली. त्याचवेळी अग्निशामक विभागाचा बंब दाखल झाला आणि आग विझविली. पण, तोवर अख्खी बस जळून खाक झाली होती.

‘अग्निशामक’ला विलंब अन्‌ बस पूर्ण जळाली

सोलापूर शहरापासून काही किमी अंतरावरील कुंभारी पुलावर बस पेटत होती. त्यावेळी चालक-वाहकाने सोमवारी सायंकाळी ६.२१ वाजता अग्निशामक विभागाला संपर्क करून मदत मागितली. पण, अग्निशामक गाडी पोचायला ३५ ते ४५ मिनिटे लागली, तोपर्यंत बसगाडी पूर्णपणे जळून खाक झाली होती. अग्निशामकची मदत १५ मिनिटात मिळाली असती तर आमची बस वाचली असती, अशी हळहळ कुर्डुवाडी आगारप्रमुखांनी व चालक-वाहकांनी व्यक्त केली.

तीव्र उन्हात जुनाट गाड्यांना दूरचा प्रवास नको

राज्यातील अनेक विभागांमध्ये विशेषत: सोलापूर विभागात आठ-दहा वर्षांपूर्वीच्या जुनाट बसगाड्यांची संख्या मोठी आहे. सात-आठ वर्षांपूर्वीच्या जुन्या बसगाड्या तीव्र उन्हात लांबच्या प्रवासासाठी पाठविल्या जातात. प्रवाशांच्या सुरक्षिततेसाठी अशा जुन्या गाड्यांना दूरचा प्रवास नकोच, अशा प्रवाशांच्या प्रतिक्रिया आहेत.